ژوب : بلوچستان کے علاقے ژوب میں حساس ادارے نے شدت پسندوں کی جانب سے زمین میں چھپایا گیا اسلحہ برآمد کرلیا۔ تفصیلات کے مطابق دہشت گردوں کیخلاف قانون نافذ کرنے والے اداروں کی کارروائیاں جاری ہیں
ایف سی ترجمان کا کہنا ہے کہ ایف سی اور حساس ادارےکی جانب سے ژوب کے علاقے مرغا کبزئی میں مشترکہ کارروائی کی گئی ہے ۔
کارروائی کے دوران شدت پسندوں کی جانب سے زیرزمین چھپائے گئے اسلحے کی بھاری کھیپ برآمدکی گئی۔
برآمد شدہ اسلحہ اور گولہ بارود میں آٹھ بم،ایک خودکش جیکٹ،چھ عدد گولے، ایک بیگ بارود،آر پی جی سیون کے چار فیوز، چار عدد موٹر فیوز، ڈیٹونیٹر اور دیگر بم بنانے کے آلات شامل ہیں۔
ترجمان کاکہناتھا کہ برآمد اسلحہ اور گولہ بارود شدت پسندوں نے تخریب کاری کےلیے ذخیرہ کیا تھا۔
