لندن: برطانیہ کے شہر مانچسٹر میں 19 سالہ پاکستانی نژاد نوجوان کو بے دردی سے قتل کردیا گیا۔
برطانوی میڈیا رپورٹس کے مطابق واقعہ اولڈہم میں چیویٹ ایونیو میں پیش آیا جہاں نوجوان کو چاقو کے وار سے موت کے گھاٹ اتار دیا گیا۔
لرزہ خیز قتل کی واردات کے بعد پولیس نے 2 مشتبہ افراد کو گرفتار کر لیا ہے، ابتدائی طور پر واقعہ کی وجہ دو گروپوں میں جھگڑے کو قرار دیا گیا ہے۔
پولیس کا کہنا ہے کہ ایمرجنسی نمبر پر کال موصول ہونے کے بعد فوری طور پر ٹیمیں جائے وقوعہ پر پہنچیں تو خون میں لت پت نوجوان کو ایمبولینس کے ذریعے مقامی اسپتال منتقل کیا گیا جہاں وہ زخموں کی تاب نہ لاتے ہوئے چل بسا۔
پولیس کے مطابق جائے وقوعہ کو سیل کر دیا گیا ہے اور تفتیشی ٹیموں نے ابتدائی شواہد اکٹھے کر کے فرانزک تجزیے کے لیے لیب بھجوا دیے ہیں۔
تفتیشی افسر نے شہریوں سے واقعے کے متعلق معلومات فراہم کرنے کی اپیل کرتے ہوئے کہا ہے کہ اگر شہری اس معاملے سے متعلق کچھ بھی بتانا چاہے تو پولیس سے رابطہ کرے۔
تفتیشی افسر کا کہنا ہے کہ گرفتار مشتبہ افراد میں سے ایک کی عمر 20 سال اور دوسرے کی 21 سال ہے، دونوں سے تفتیش کی جارہی ہے۔