سائنس کی ترقی کی بدولت زندگی آسان ہوگئی لیکن اس کے ساتھ ہی نت نئی ایجادات کے بہت سے نقصان بھی سامنے آرہیں ہیں جس میں مختلف اسکرین سے نکلنے والی نیلی روشنی بھی شامل ہیں۔
اس جدید دور میں دنیا کی بڑی آبادی دن کا زیادہ تر وقت اسکرین کے سامنے بیٹھ کر گزارتی ہے خواہ وہ فون ہو، ٹیبلیٹ ہو، لیپ ٹاپ ہو یا کمپیوٹر ہو، جہاں اس کے سامنے دیر تک بیٹھنے کے نقصانات ہیں وہی ان ڈیوائسز سے خارج ہونے والی نیلی روشنی جلد کو بھی کئی طرح سے متاثر کرتی ہے۔
اسکرین کی والی نیلی روشنی سے جلد پر عمر رسیدگی کے اثرات وقت سے پہلے نمودار ہونے لگتے ہیں، ماہرین کا کہنا ہے کہ جلد کی حفاظت کی مصنوعات میں اب بلیو لائٹ اسکن پروڈکٹس کا استعمال کیا جانا نہایت ضروری ہے۔
اسکرین سے نکلنے والی نیلی روشنی جو کہ مختصر طول موج کی روشنی ہوتی ہے یہ وقت سے پہلے بڑھاپے سے لے کر رنگت اوردیرپا ہائپر پگمنٹیشن تک ہر چیز کا سبب بن سکتی ہے۔
اگرچہ کوئی بھی شخص ان نیلی روشنی کے نقصانات کو جان کر ان ڈیوائسز کا استعمال ترک نہیں کرسکتا لیکن جلد کو اس سے تحفظ فراہم کرنے کے لیے جلد کی دیکھ بھال کرنے والی مصنوعات کا استعمال ضرور کرسکتا ہے۔
ماہرین کے مطابق بلیو لائٹ اسکن کیئر مصنوعات نقصان دہ نیلی روشنی کی شعاعوں کو روکنے اور ان کے کچھ اثرات کو دور کرنے کے لیے ڈیزائن کی گئی ہیں لیکن یہ کہنا قبل از وقت ہے کہ یہ مصنوعات جلد کو ان نیلی روشنی کے اثرات سے تحفظ فراہم کریں گی یا نہیں۔
بلیو لائٹ کیا ہے اور یہ نقصان دہ کیوں ہے؟
نیلی روشنی نظر آنے والے روشنی کے اسپیکٹرم کا ایک رنگ ہے جو کمپیوٹر اسکرینوں، ٹی وی، فونز، اور یہاں تک کہ سورج کی باقاعدہ روشنی میں بھی موجود ہوتا ہے اس طرح دیکھا جائے تو یہ ہر جگہ پر موجود ہے۔
بلیو لائٹ اسکن کیئر کیا ہے؟
بلیو لائٹ اسکن کیئرپروڈکٹس بہت سی شکلوں میں دستیاب ہے جیسے اسپرے، کریم اور جیل سے لے کر سن اسکرین تک جو نیلی روشنی کو روکنے اور آپ کی جلد کو جوان رکھنےکے لیے استعمال کی جا سکتی ہیں۔
ایسی نائٹ کریمیں بھی دستیاب ہیں جو نیلی روشنی اور ڈیجیٹل ڈیفنس سیرم کے ذریعے نیلی روشنی کی وجہ سے پیدا ہونے والی جھریوں کو ریورس کرتی ہیں۔
