راولپنڈی : پمز اسپتال کے ڈاکٹروں نے بانی پی ٹی آئی کو صحت مند قرار دے دیا ، ذاتی معالج ڈاکٹر عاصم بھی ڈاکٹرز کی ٹیم بھی موجود تھے۔
تفصیلات کے مطابق اڈیالہ جیل میں بانی پی ٹی آئی سے ذاتی معالج ڈاکٹرعاصم کی ملاقات ہوئی ، ڈاکٹرعاصم کے ساتھ پمز اسپتال کے 3 ڈاکٹرز کی ٹیم بھی موجود تھی۔
پمز اسپتال کے 4 ڈاکٹرز پر مشتمل میڈیکل بورڈ نے بانی پی ٹی آئی کا طبی معائنہ کیا اور بانی پی ٹی آئی کو صحت مند قرار دیا۔
ڈاکٹر عاصم نے بتایا کہ بانی پی ٹی آئی کی صحت اچھی ہے، میڈیکل بورڈ نے ان کے کچھ ٹیسٹ تجویز کئے ہیں ، ان کے طبی معائنے کی رپورٹ تیارکی جائےگی۔
اسلام آباد ہائی کورٹ نے طبی معائنے کیلئے میڈیکل بورڈ تشکیل دینےکی ہدایت کی تھی۔
گذشتہ ماہ بھی پمز اسپتال کے ڈاکٹرز نے عمران خان کا طبی معائنہ مکمل کر کے پارٹی قیادت کو اس سے باقاعدہ آگاہ کیا تھا۔
بعد ازاں سابق وزیر اعظم و بانی پاکستان تحریک انصاف (پی ٹی آئی) عمران خان میڈیکل چیک اپ کی رپورٹ سامنے آئی تھی ، جس میں بانی ہشاش بشاش قرار دیا گہا تھا اور بتایا تھا کہ ان کا بلڈ پریشر بھی نارمل ہے۔
