عمرکوٹ: صوبہ سندھ کے شہر عمر کوٹ میں کلانکر جھیل میں کشتی الٹ گئی، جس کے نتیجے میں 6 افراد ڈوب کر جاں بحق ہو گئے۔
تفصیلات کے مطابق عمر کوٹ کے گاؤں ڈھورو نارو کے قریب کلانکر جھیل میں کشتی الٹنے کا افسوس ناک واقعہ پیش آیا ہے، ریسکیو ذرائع کا کہنا ہے کہ کشتی میں 10 افراد سوار تھے۔
کشتی الٹنے سے 6 افراد ڈوبے جن میں سے 3 خواتین اور ائک بچے کی لاشیں نکال لی گئی ہیں تاہم ڈوبنے والے 2 بچوں کی لاشیں تاحال نکالی نہیں جا سکیں، جب کہ 4 افراد حادثے میں محفوظ رہے۔
محکمہ پولیس کا کہنا ہے کہ حادثے کا شکار ہونے والے افراد سیھڑ فقیر درگاہ کی زیارت سے واپس آ رہے تھے، جاں بحق افراد کے ورثا کی جانب سے کہا گیا ہے کہ پرانی ہونے کے باعث کشتی میں پانی بھر گیا تھا۔
یاد رہے کہ 29 جنوری کو خیبر پختون خوا کے ضلع کوہاٹ کے تاندہ ڈیم میں ایک کشتی الٹنے سے ایک مدرسے کے 52 بچے ڈوب کر جاں بحق ہو گئے تھے۔
