کراچی: لیاری ندی سے 2 روز بعد 8 سالہ نبیل کی لاش مل گئی، بچہ اپنے دوستوں کے ساتھ کھیلتے ہوئے ڈوب گیا تھا۔
تفصیلات کے مطابق کراچی کے علاقے گلشن اقبال، راجپوت کالونی کے قریب لیاری ندی میں آٹھ سالہ بچہ نبیل کھیلتے ہوئے گر گیا تھا، نبیل کی لاش آج لیاقت آباد بلوچ ہوٹل کے قریب ندی سے مل گئی۔
ایدھی بحری خدمات کی ٹیم نے 2 روز سے بچے کی تلاش جاری رکھی ہوئی تھی، ورثا نے سندھ حکومت سے اپیل کی تھی کہ ہیوی مشینری بھیج کر بچے کو تلاش کیا جائے۔
نبیل ہفتے کی شام دوستوں کے ساتھ لیاری ندی پر گیا تھا اور زندہ نہ لوٹ سکا، پہلے دن امدادی ٹیمیں نبیل کو تلاش کرنے میں ناکام رہی تھیں۔
بچے کی لاش کو ضابطے کی کارروائی کے بعد ورثا کے حوالے کیا جائے گا۔ واضح رہے کہ کراچی کے مختلف علاقوں میں کئی ماؤں کے جگر گوشے مین ہول یا نکاسی آب کے نالوں میں ڈ وب کر لقمہ اجل بن چکے ہیں۔
