ایئرانڈیا کی کریش ہونے والی پرواز کے طیارے بوئنگ 787 ڈریم لائنز کو پیش آنے والا المناک واقعہ اپنی نوعیت کا پہلا حادثہ ہے۔
بوئنگ کمپنی کے طیارے کے اس ماڈل کو اب تک اس طرز کا کوئی حادثہ پیش نہیں آیا جس میں اتنا جانی نقصان ہوا ہو یا طیارہ ایسے گرا ہو، بوئنگ کا یہ 787 طیارہ 2005 میں متعارف کروایا گیا تھا اور چھ ہفتے قبل ہی کمپنی کی جانب سے اس ماڈل کی کارکردگی کو سراہا گیا تھا۔
بوئنگ کے اس ماڈل پر ایک ارب سے زائد مسافر سفر کر چکے ہیں، 787 طیاروں کا بیڑا پچاس لاکھ پروازوں میں 30 ملین گھنٹے پروازیں کرچکا ہے۔
بھارتی طیارے میں سوار ہونے سے قبل وی لاگر نے کیا کہا تھا؟ ویڈیو وائرل
دنیا بھر میں اس ماڈل کے 1175 طیارے مختلف ایئر لائنز کے زیرِاستعمال ہیں، بوئنگ کی جانب سے ایئر انڈیا کے حادثے کے بعد بیان میں کہا گیا ہے کہ اس حوالے سے معلومات اکھٹی کر رہے ہیں۔
بوئنگ کمپنی گزشتہ کچھ عرصے سے اپنے دوسرے ماڈل 737 کو پیش آنے والے حادثات کے وجہ سے کافی مسائل کا سامنا کر رہی ہے۔
بھارتی شہر احمدآباد میں 787 ڈریم لائنر کو حادثہ پیش آنے کے بعد کمپنی کو سیفٹی کو لےکر مزید مسائل کا سامنہ کرنا پڑے گا۔
