ممبئی: بالی ووڈ اداکار ویویک اوبرائے نے سوشل میڈیا پر زیر گردش اپنی موت کی خبروں کی تردید کردی۔
بھارتی میڈیا رپورٹس کے مطابق گزشتہ دنوں بھارت کی تامل فلم انڈسٹری کے معروف اداکار ویویک دل کا دورہ پڑنے سے چل بسے تھے جس کے بعد نام کی مماثلت کی وجہ سے سوشل میڈیا پر یہ خبریں گردش کرنے لگیں کہ بالی ووڈ اداکار ویویک اوبرائے عالمی وبا کورونا وائرس کے باعث دنیا سے رخصت ہوگئے۔
سوشل میڈیا پر زیر گردش ان جھوٹی خبروں کی تردید کرتے ہوئے بالی ووڈ اداکار ویویک اوبرائے کا بیان سامنے آگیا۔
ویویک اوبرائے نے سماجی رابطے کی ویب سائٹ ٹویٹر پر لکھا کہ ’چنائے کے اسپتال میں میرے داخل ہونے کی خبریں بالکل بے بنیاد اور جھوٹی ہیں۔‘
اداکار نے لکھا کہ ’میں یہاں واضح کرنا چاہتا ہوں کہ میں ممبئی میں اپنی فیملی کے ہمراہ بالکل صحت مند اور محفوظ ہوں۔‘
There has been a false news report about me being hospitalised in Chennai,I would like to clarify that I am safe & healthy with my family in Mumbai,but deeply saddened to hear abt the demise of @Actor_Vivek from the Tamil industry. I extend my deepest condolences to his family🙏
— Vivek Anand Oberoi (@vivekoberoi) April 17, 2021
ویویک اوبرائے نے کہا کہ ’تامل اداکار ویویک کی اچانک موت کی خبر سن کر بہت دکھ ہوا اور میں اس موقع پر اداکار کے اہلخانہ سے دلی تعزیت کرتا ہوں۔‘
واضح رہے کہ دو روز قبل بھارت کی تامل فلم انڈسٹری کے مقبول ترین اداکار ویویک 59 سال کی عُمر میں دل کا دورہ پڑنے کی وجہ سے چل بسے تھے۔
بھارتی میڈیا رپورٹس کے مطابق تامل اداکار ویویک کو جمعے کے روز دل کا دورہ پڑا تھا جس کے بعد اُنہیں چنائے کے ایک اسپتال میں داخل کیا گیا تھا، تامل اداکار ویویک دل کی تکلیف برداشت نہ کرتے ہوئے ہفتہ کی صبح 4 بج کر 45 منٹ پر اس دُنیا سے رخصت ہوگئے تھے۔