اگر سال 2023 کو شاہ رخ خان کا سال کہا جائے تو بے جا نہ ہوگا، اس سال انھوں نے بالی وڈ پر پھر سے اپنی بادشاہت کا سکہ جمایا۔ کنگ خان نے لگاتار تین بلاک بسٹر فلمیں دے کر شائقین اور ناقدین دونوں کو ہی مسحور کیا۔

تاہم اگر دیگر دو خانز یعنی سلمان اور عامر کی بات کی جائے تو ان کے لیے یہ سال بالکل بھی خاص نہیں رہا بلکہ دبنگ خان کے لیے تو یہ عرصہ ناکامیوں سے پُر رہا۔ ماس سینما کے شائقین سلمان کو بہت پسند کرتے ہیں، ان کے ایکشن سے بھرپور سینز دیکھنے کے لیے ایک مووی کو سینما میں جا کر دو تین بار بھی دیکھ آتے ہیں۔ تاہم سلو میاں شاید اپنے کیریئر میں اس سال کو یاد کرنا پسند نہیں کریں گے۔

آئیے نظر ڈالتے ہیں اس سال بالی وڈ پر برسوں سے راج کرنے والے تین خانز کی کارکردگی پر کہ انھوں نے اپنی فلمی کیریئر میں امسال کیا کھویا اور کیا پایا۔

سب سے پہلے شاہ رخ خان کی فلموں پر نظر ڈالتے ہیں کیوں کہ یہ سال ان کی کامیابیوں سے عبارت رہا۔ اس سال وہ چھائے رہے اور ہندی سینما کی تاریخ میں سب سے زیادہ بزنس کرنے والی فلم بھی شاہ رخ کے نام ہوگئی۔

شاہ رخ خان
پٹھان: جنوری کی 15 کو ریلیز ہونے والی فلم پٹھان اس سال شاہ رخ خان کی پہلی مووی تھی۔ اس فلم سے کنگ خان نے چار سال کے طویل عرصے کے بعد بالی وڈ میں واپسی کی تھی۔ ان کی یہ واپسی شاندار رہی اور پٹھان نے باکس آفس پر دھوم مچا دی۔

پہلے چار دنوں میں ہی دنیا بھر میں پٹھان نے 400 کروڑ کا بزنس کرتے ہوئے کئی ریکارڈ پاش پاش کرڈالے۔ باکس آفس پر اپنی ریلیز کے پہلے دن سے ہی فلم پٹھان نے ناظرین کا دل جیت لیا۔

بھارتی میڈیا رپورٹس کے مطابق فلم پٹھان نے محض دو روز کے اندر ہی کے جی ایف ٹو جیسی فلم کو شکست دے دی تھی، کے جی ایف ٹو کے ہندی ورژن نے دوسرے دن 47 کروڑ روپے کا بزنس کیا تھا مگر پٹھان نے تو ڈبل سینچری بناڈالی۔

اس فلم نے مقبوضہ کشمیر میں بھی خوب پزیرائی حاصل کی ہے، جس کے باعث 32 سال بعد وادی میں سینما گھروں میں ہاؤس فل کا بورڈ بھی لگا۔ پٹھان نے بھارت میں 543 کروڑ کا بزنس کیا جبکہ دنیا بھر میں اس کی کمائی 1050 کروڑ رہی۔

جوان: اس کے بعد 7 ستمبر کو شاہ رخ خان کی فلم جوان ریلیز ہوئی اور اس نے ہندی سینما کی تاریخ بدل ڈالی۔ سُپر اسٹار شاہ رخ خان کی بلاک بسٹر فلم ’جوان‘ نے سال 2023 میں باکس آفس پر سب سے زیادہ کمائی کرنے کا اعزاز حاصل کیا۔

انڈین ایکسپریس کی رپورٹ کے مطابق ’جوان‘ نے دنیا بھر میں 1100 کروڑ روپے کا بزنس کیا جبکہ یہ بھارت میں رواں سال کی سب سے زیادہ پسند کی جانی والی فلم بھی رہی۔

فلم نے صرف بھارت میں 640 کروڑ کی کمائی کرتے ہوئے ایسا ریکارڈ قائم کیا جو کہ اب تک کوئی ہندی فلم نہیں بناسکی۔ یہ تاریخ کی پہلی ہندی فلم بھی بنی جس نے بھارت میں 600 کروڑ روپے کمائے۔ شاہ رخ نے اس فلم میں ڈبل رول ادا کیا تھا جبکہ ان کے مختلف روپ کو بھی شائقین نے کافی پسند کیا۔

دلچسپ بات یہ ہے ہک فلموں کے حوالے سے مشہور صفِ اول کی ویب سائٹ آئی ایم ڈی بی نے ’جوان‘ کے ڈائریکٹر ایٹلی کو ایوارڈ سے نوازا اور اپنے انسٹاگرام اکاؤنٹ سے ان کی تصویر بھی شیئر کی۔

شاہ رخ خان کی ’جوان‘ کے لیے مداحوں نے جس طرح بیتابی اور دلچسپی ظاہر کی وہ اس سے پہلے کسی فلم کے لیے دیکھنے میں نہیں آئی تھی۔

ڈنکی: سال کے آخر میں 21 دسمبر کو شاہ رخ کی فلم ڈنکی ریلیز ہوئی جس کی ہدایت کاری کے فرائض معروف ہدایت کار راج کمار ہیرانی نے انجام دیے ہیں۔ یہ پہلی بار ہے کہ شائقین کو کسی فلم کے لیے کنگ خان اور ہیرانی کا امتزاج دیکھنے کو ملا ہے۔

ڈنکی نے پہلے دن بھارتی باکس آفس پر 29 کروڑ کا بزنس کیا جبکہ فلم نے چھ دنوں میں تقریباً 140 کروڑ روپے چھاپ لیے ہیں۔ دنیا بھر میں فلم کی کمائی 250 کروڑ کے ہندسے کو عبور کرچکی ہے۔ گو کہ شاہ رخ کے حساب سے اس فلم کی کمائی کم تصور کی جارہی ہے مگر 120 کروڑ کے کم بجٹ سے بنائی گئی فلم نے محض چھ دنوں میں دنیا بھر سے اپنے بجٹ سے دگنی کمائی کرلی ہے۔ یہ چیز فلم کے سپر ہٹ ہو نے کے کافی خیال کی جاسکتی ہے۔

فلم ماہرین کا کہنا ہے کہ شاہ رخ خان کی ڈنکی اس سال کے آخر تک بھارت میں تقریباً 200 کروڑ کا بزنس کرنے میں کامیاب ہوجائے گی۔ عالمی باکس آفس پر اس کی کمائی 31 دسمبر تک 350 کروڑ کے آس پاس ہوگی۔

سلمان خان
بالی وڈ کے اکلوتے کنوارے ہیرو سلمان خان جن کا نام پچھلے سال تک کسی بھی فلم کی کامیابی کی ضمانت کے لیے کافی خیال کیا جاتا تھا یہ سال ان کے لیے بالکل بھی خاص نہیں رہا۔ اگر اسے سلمان خان کی ناکامی کے سال سے تشبیح دی جائے تو کچھ اتنا غلط بھی نہیں ہوگا۔

کسی کا بھائی کسی کی جان: عید کے موقع پر 21 اپریل کو سلمان خان کی فلم کسی کا بھائی کسی کی جان ریلیز ہوئی جس میں ان کے مقابل ساؤتھ کی اداکارہ پوجا ہیج نے مرکزی کردار ادا کیا تھا۔ تاہم یہ فلم اپنی لاگت کو بھی پورا نہ کرسکی اور اس نے بھارتی باکس آفس پر صرف 110 کروڑ روپے کمائے۔

فلم کی ناکامی کی ایک وجہ اس میں ضرورت سے زیادہ اداکاروں کی بھرمار تھی۔ فلم میں جگاپتھی بابو، راگھو جوئیل اور شہناز گل نے بھی اداکار کے جوہر دکھائے تھے تاہم وہ اپنی پرفارمنس کے ذریعے ناظرین کی توجہ مبذول کرانے میں ناکام رہے۔

ٹائیگر 3: اس کے بعد 12 نومبر کو دبنگ خان کی فلم ’ٹائیگر تھری‘ ٹھیٹرز کی زینت بنی۔ اس فلم کا ٹریلر دیکھنے کے بعد فلمی نقادوں اور مداحوں کو بڑی توقع تھی کہ یہ شاہ رخ خان کی جوان کا ریکارڈ بھی توڑ سکتی ہے مگر ایسا نہ ہوسکا۔

سلمان خان جن کے مداح پورے بھارت میں موجود ہیں یہاں تک کہ انھیں جنوبی بھارت میں بھی کافی پسند کیا جاتا ہے۔ تاہم ٹائیگر تھیر سلمان کے اسٹارڈم کے حساب سے جادو جگانے میں ناکام رہی اور بھارت بھر میں یہ فلم محض 282 کروڑ ہی کما سکی جبکہ عالمی باکس آفس پر فلم نے 466 کروڑ روپے کمائے۔

گو کہ فلم نے اپنے بجٹ سے زیادہ رقم تو کمالی مگر سلمان خان، کترینہ کیف اس فلم کے لیے اپن چھاپ نہ چھوڑ سکے۔ فلم میں بطور ولن انٹری دینے والے عمران ہاشمی کی پرفارمنس کو شروع میں تو سراہا گیا مگر ان کا رنگ بھی جلد پھیکا پڑنے لگا اور فلم مقامی باکس آفس پر 300 کروڑ روپے کا ہندسہ بھی عبور نہ کرسکی۔

سلمان خان کو اس سال جو تھوڑی سی کامیابی ملی وہ 15 جنوری کو شاہ رخ خان کی ریلیز ہونے والی فلم جوان کی صوت میں تھی۔ مذکورہ فلم میں کنگ خان اور سلمان خان کے کیمیو کو شائقین نے کافی پسند کیا۔ فلم میں سلمان خان کی انٹری میں کافی تالیاں بھی بجیں اور ان کے مداحوں نے تو یہ تک کہا کہ فلم نے اچھی خاص کمائی سلمان کی وجہ سے بھی کی ہے۔

عامر خان
عامر خان کے لیے یہ سال بنا کسی فلم کی ریلیز کے گزر گیا۔ مسٹر پرفیکشنسٹ 2023 میں سینما تھیٹرز سے دور رہے۔ اداکار نے گزشتہ سال اعلان کیا تھا کہ وہ اپنی فیملی کو وقت دینے کے لیے فلموں سے وقفہ لے رہے ہیں۔

بالی وڈ اداکار کی آخری فلم ’لال سنگھ چھڈھا‘ تھی جو 2022 میں سینماؤں میں ریلیز ہوئی تھی تاہم یہ فلاپ ثابت ہوئی۔ فلم میں امیتابھ بچن اور کترینہ کیف کی موجودگی بھی اسے ناکامی سے نہ بچاسکی۔

عامر خان کے ساتھ اس سال یہ ضرور ہوا کہ وہ چنئی میں طوفانی بارش اور سیلابی صورتحال کے دوران وہاں پھنس گئے، جہاں سے امدادی کارکنوں نے انھیں ریسکیو کیا۔ بھارتی اداکار وشنو وشال نے سوشل میڈیا پر تصوریر شیئر کرتے ہوئے بتایا کہ انھیں اور عامر خان کو چنئی سے امدادی کارکنوں نے ریسکیو کیا۔

اس سال عامر خان نے یہ بھی اعتراف کیا کہ وہ اور ان کی بیٹی ڈپریشن کا شکار تھے۔ انھوں نے ورلڈ مینٹل ہیلتھ ڈے کے موقع پر بیٹی ایرا خان کے ہمراہ ’تھراپی کے فوائد‘ سے متعلق ویڈیو بھی جاری کی۔

عامر اور ایرا نے زور دیا کہ وہ ضرورت پڑنے پر ڈپریشن کا علاج کروائیں۔ دونوں نے انکشاف کیا کہ وہ کئی سالوں سے تھراپی سے فائدہ اٹھا رہے ہیں۔ ہمیں کبھی اپنی ذہنی یا جذباتی صحت کے لیے مدد کی ضرورت ہو تو ہمیں ہچکچاہٹ کے بغیر پیشہ ور افراد کے پاس جانا چاہیے۔

اس سال بالی وڈ مسٹر پرفیکشنسٹ عامر نے ’لاہور 1947‘ کے نام سے فلم بنانے کا اعلان بھی کیا۔ مذکورہ فلم عامر خان پروڈکشن کے تحت بنائی جائے گی جس کے ہدایت کار راج کمار سنتوشی جبکہ پروڈیوسر خود عامر خان ہوں گے۔ فلم میں مرکزی کردار کیلیے سنی دیول کو چنا گیا ہے۔

بھارتی میڈیا کے مطابق اب عامر خان کی فلموں میں واپسی 2024 میں کرسمس کے موقع پر ہوگی۔ فلم کا نام اب تک سامنے نہیں آیا مگر اس پر کام کا آغاز 20 جنوری سے ہوگا۔ یعنی کے آئندہ سال پھر سے شائقین عامر خان کو بڑی اسکرین پر دیکھ سکیں گے۔