نئی دہلی: بھارت میں نامعلوم شخص نے اداکار رجنی کانت کے گھر کو بم سے اڑانے کی دھمکی دے دی۔
بھارتی میڈیا رپورٹس کے مطابق سپر اسٹار رجنی کانت کے گھر پر بم دھمکی کے سبب پولیس نے ان کے گھر کی مکمل تلاشی لی اور گھر کو کلیئر قرار دے کر بم کی خبر کو افواہ قرار دے دیا۔
پولیس کے مطابق ایک نامعلوم شخص نے پولیس کنٹرول روم پر فون کیا اور کہا کہ گریمس روڈ پر واقع سپر اسٹار رجنی کانت کے گھر میں بم نصب کیا گیا ہے۔
بھارتی پولیس کے مطابق سراغ رساں کتوں کی مدد سے پولیس فوری طور پر اداکار کے گھر پہنچی اور تلاشی لینے کے بعد پتا چلا کہ یہ ایک افواہ تھی، اب پولیس کال کرنے والے شخص کا پتا لگانے کی کوشش کررہی ہے۔
پولیس کا کہنا ہے کہ ماضی میں اداکاروں کو اس طرح کی دھمکیاں دی جاتی رہی ہیں، دریں اثنا رجنی کانت کے مداحوں نے اس فعل کی مذمت کرتے ہوئے سوشل میڈیا پر غم و غصے کا اظہار کیا ہے۔
رجنی کانت کا بم کی دھمکی پر ردعمل دیتے ہوئے کہنا تھا کہ ’اس وقت بم سے زیادہ کرونا وائرس سے خطرہ ہے اسی لیے لاک ڈاؤن کے سبب گھر میں موجود ہیں۔‘
واضح رہے کہ تامل اداکار لاک ڈاؤن سے قبل اپنی نئی آنے والی فلم ’اناتھ‘ کی شوٹنگ میں مصروف تھے، فلم کا 60 فیصد کام مکمل کرلیا گیا ہے جبکہ لاک ڈاؤن کے سبب فلم کی شوٹنگ روکنا پڑی۔
