معروف بھارتی فلمساز بونی کپور کا اپنی اہلیہ سری دیوی کی زندگی پر بننے والی بائیوپک کی تیاری سے متعلق خبر پر ردعمل سامنے آگیا۔
انگلش ونگلش کی آنجہانی اداکارہ سری دیوی کے بہت سے مداح ان کی زندگی پر بننے والی بائیوپک دیکھنا چاہتے ہیں اور اسی وجہ سے یہ افواہیں گردش کررہی تھیں ان پر بائیوپک بنائی جا رہی ہے جس کے لیے تیاری بھی شروع ہوگئی ہے۔
تاہم پروڈیوسر اور ان کے شوہر بونی کپور نے لیجنڈری اداکارہ کی زندگی پر بننے والی بائیوپک کی تیاری سے متعلق افواہوں کو مسترد کر دیا ہے۔
بھارتی میڈیا ڈی این اے کے ساتھ گفتگو کرتے ہوئے بونی کپور نے کہا سری دیوی ایک پرائیوٹ شخصیت تھیِں انہوں نے ہمیشہ اپنی نجی زندگی کو میڈیا سے دور رکھا تھا تو اب بھی ان کی نجی زندگی کو لوگوں سے دور رکھنا چاہیے۔
انہوں نے کہا کہ مجھے نہیں لگتا کہ سری دیوی پر کبھی کوئی بائیوپک بنے گی اور جب تک میں زندہ ہوں تب تک میں ایسا نہیں ہونے دوں گا۔
واضح رہے کہ بونی کپور نے جون 1996 میں بالی ووڈ کی آنجہانی اداکارہ سری دیوی سے شادی کی تھی، اس جوڑی کی دو بیٹیاں ہیں، جھانوی کپور اور خوشی کپور۔
سال 2018 میں سری دیوی دبئی کے ایک ہوٹل میں موت دل کا دورہ پڑنے کی وجہ سے باتھ ٹب میں ڈوب کر چل بسیں تھیں۔
