بھارتی پروڈیوسر بونی کپور نے اپنے بھائی انیل کپور اور آنجہانی بیوی کی سُپرہٹ فلم ’جدائی‘ سے متعلق برسوں بعد اہم انکشاف کیا ہے۔
ڈی این اے بھارت سے گفتگو کرتے ہوئے بھارتی پروڈیوسر بونی کپور کا کہنا ہے کہ انہیں ایک پروڈیوسر کے طور پر ہمیشہ کچھ سخت چیلنجوں کا سامنا رہا ہے، لیکن انہوں نے تمام رکاوٹوں پر قابو پاتے ہوئے کامیابی حاصل کی۔
آنجہانی اداکارہ سری دیوی کے شوہر بونی کپور نے کہا ’’میرا سفر (بطور پروڈیوسر) ایڈونچر، چیلنجز سے بھرا ہوا ہے، شاید مجھے خدا نے ایسے چیلنجز کے لیے منتخب کیا ہے جس کی وجہ سے میں ان سب چیلنجز کا سامنا کرسکتا ہوں‘‘۔
بونی کپور کا کہنا تھا کہ میری پچھلی کئی فلموں میں مجھے طرح طرح کے چیلینجز کا سامنا کرنا پڑا، جیسے مسٹر انڈیا، نوانٹری، وانٹڈ اور جدائی تھی، نوانٹری فلم کے دوران میں مالی مشکلات کا شکار تھا۔
بونی کپور نے ماضی میں پیش آنے والے رکاوٹوں کو یاد کرتے ہوئے بتایا کہ ’’ 1997 میں فلم جدائی پروڈیوس کیا، اس فلم میں میری بیوی سری دیوی اور بھائی انیل کپور ہیرو تھے، مجھے کہا گیا کہ میری یہ فلم فلاپ ہوجائے گی‘‘۔
انہوں نے بتایا کہ فلم جدائی کے دروان بھی ایک چیلنج کا سامنا کرنا پڑا، میری بیوی سری دیوی اس دوران حاملہ تھی اور انیل کپور میرا بھائی اس فلم میں ہیرو تھا، لوگوں نے کہا پکچر کیسے چلے گی بھابھی کے ساتھ پیار کیا ہے۔
واضح رہے کہ انیل کپور نے 1997 کی فلم جدائی میں بالی ووڈ کی صف اول کی اداکارہ آنجہانی اداکارہ سری دیوی اور ارمیلا متونڈکر کے ساتھ اس فلم میں مرکزی کردار نبھایا تھا۔
