کراچی: شہر قائد کے ایک بڑے اسپتال کے بچوں کے وارڈ میں کتابوں کی ریل گاڑی متعارف کرائی گئی ہے، جو علاج کے لیے داخل بچوں کو بہترین وقت گزاری کے لیے کتابیں فراہم کرے گی۔
تفصیلات کے مطابق آغا خان یونیورسٹی اسپتال میں بچوں کے اسپتال نے اپنے ننھے مریضوں کے لیے "کتاب گھر” کے نام سے موبائل لائبریری کی ایک منفرد کاوش کا آغاز کیا ہے۔
کتابوں کی یہ ٹرین پیڈیاٹرک اینڈ چائلڈ ہیلتھ سروس لائن کی طرف سے 100 سے زائد کتابوں کے ساتھ متعارف کرائی گئی ہے، اس سلسلے میں آج پیڈیاٹرک وارڈ کے کھیل کے میدان میں ایک تقریب بھی منعقد کی گئی۔
کتاب گھر ریل گاڑی کا اسٹیشن پیڈیاٹرک وارڈ کی انتظارگاہ میں کاؤنٹر کے سامنے ہوگا، اور وہ روزانہ مریضوں کو کتابیں تقسیم کرتی ہوئی پورے پیڈیاٹرک وارڈ میں گھومے گی۔
سی ای او ڈاکٹر شاہد شفیع نے کہا کہ اس اقدام کا مقصد وارڈ میں داخل ہونے والے ننھے مریضوں کی شعوری اور ذہنی نشوونما ہے۔
خیال رہے کہ اسپتال میں داخل بچے بہت جلد تھک جاتے ہیں، اسپتال میں ان بچوں کو مصروف رکھنے کے لیے زیادہ سرگرمیاں بھی نہیں ہوتیں، بعض اوقات بچوں کو 72 گھنٹوں سے زائد اسپتال میں رہنا پڑ جاتا ہے، جس سے ان کی تھکن اور ذہنی دباؤ میں اضافہ ہو جاتا ہے۔
سروس لائن چیف برائے پیڈیاٹرک اینڈ چائلڈ ہیلتھ ڈاکٹر علی فیصل سلیم نے کہا کہ مختلف کتابیں جیسا کہ کہانیاں، آرٹ اور سرگرمیوں کی کتابیں ان بچوں کے ذہنی دباؤ میں کمی لاتی ہیں، اور وہ زیادہ پُر سکون محسوس کرتے ہیں۔
