افریقی ملک بوٹسوانا میں کان کنی کرنے والے ایک غیرملکی کمپنی نے اعلان کیا ہے کہ کان سے ایک ہیرا دریافت ہوا ہے۔
غیرملکی خبررساں ادارے کی رپورٹ کے مطابق ہیرے کو بوٹسوانا کی ملکی کابینہ کے سامنے 7 جولائی کو پیش کیا گیا، یہ ہیرا کینیڈا کی کان کنی کی کمپنی لوکارا کو 12 جون کو ملا تھا۔
لوکارا ڈائمنڈ کمپنی کی ڈائریکٹر نسیم لہری نے بوٹسوانا کے دارالحکومت گابارو میں میڈیا سے گفتگو کرتے ہوئے کہا کہ یہ ہمارے اور بوٹسوانا کے لیے تاریخ بن رہی ہے۔
انہوں نے کہا کہ نیا دریافت ہونے والا ہیرا اپنے سائز کے اعتبار سے دنیا کا تیسرا سب سے بڑا ہیرا ہے اور اس کا وزن 1 ہزار 174 قیراط ہے۔
نسیم لہری نے بتایا کہ اس ہیرے نے یکم جون کو بوٹسوانا میں ہی ملنے والے ہیرے کی جگہ لی ہے، جسے اس وقت دنیا کا تیسرا بڑا ہیرا قرار دیا گیا تھا، اس کا وزن 1 ہزار 98 قیراط تھا۔
واضح رہے کہ دنیا بھر میں ملنے والے دس سب سے بڑے ہیروں میں سے چھ بوٹسوانا میں ہی ملے، اس طرح یہ افریقی ملک سب سے بڑے ہیرے ملنے والے ممالک کی درجہ بندی میں سرفہرست ہے۔
اب تک دنیا کا سب سے بڑا ہیرا جنوبی افریقہ میں 1905 میں ملا تھا اور اس کا وزن 3 ہزار 106 قیراط تھا۔
