The news is by your side.

Advertisement

بھارت: نو عمر لڑکا مگرمچھ کی غذا بن گیا

پیلی بھیت: بھارتی شہر پیلی بھیت میں ایک پندرہ سالہ لڑکے کو مگرمچھ نے نشانہ بنا کر اپنی غذا بنا لیا۔

بھارتی میڈیا کے مطابق بھارتی ریاست اترپردیش میں 10 دنوں کے اندر مگرمچھ نے دوسرے انسان کو شکار کر لیا، ضلع پھیلی بیت کے ایک گاؤں سمرکھیڈا میں ایک 15 سالہ لڑکا اوم پرکاش مگر مچھ کی غذا بن گیا۔

اوم پرکاش بھینس کو نہلانے کے لیے قریبی دریا کھاکھرا لے کر گیا تھا، مگرمچھ اسے جبڑوں میں دبوچ کر گہرے پانی میں کھینچ کر لے گیا۔

پولیس کا کہنا ہے کہ گم شدہ لڑکے کی ادھ کھائی لاش جمعے کے روز دریائے کھاکھرا میں پائی گئی، لاش کی حالت سے معلوم ہوتا تھا کہ اسے مگرمچھ نے کھایا ہے۔

ضلعی انتظامیہ نے دوسرے واقعے کے رونما ہونے کے بعد ایک بیان میں کہا ہے کہ اس طرح کے واقعات کی روک تھام اور انسانی جانوں کے تحفظ کے لیے آگاہی مہم چلائی جائے گی اور خطرناک علاقوں کی نشان دہی بھی کی جائے گی۔

یاد رہے کہ 27 جون کو اسی طرح کا ایک واقعہ اترپردیش کے دودھوا نیشنل پارک کے قریب بھی پیش آیا تھا، ایک 52 سالہ شہری جمیل اپنی بھینس جنگل کے قریب چرانے لے گیا تھا، کہ ایک مگرمچھ اسے جبڑوں میں دبوچ کر دریا میں لے گیا۔

رپورٹس کے مطابق تین گھنٹے کی تلاش کے بعد جمیل کی ادھ کھائی لاش دریا سے ملی تھی، معلوم ہوا کہ وہ بھینس کو پانی پلانے کے لیے مگرمچھ کے علاقے میں چلا گیا تھا.

Comments

یہ بھی پڑھیں