اردن میں زیتون کے کاشت کے موسم میں ایک 19 سالہ نوجوان شخص مشین میں گر کر جھلسنے کے بعد جان کی بازی ہار گیا۔
العربیہ نیٹ کے مطابق یہ واقعہ شمالی اردن کے گورنریٹ اِربد میں میں زیتون کا تیل نکالنے والے ایک کارخانے میں پیش آیا، جہاں 19 سالہ نوجوان محمد محمود کنانی زیتون نچوڑ نے والی مشین (بلینڈر) میں اچانک گِرا اور اس میں پھنس کر رہ گیا۔
ریسکیو کی مدد سے نوجوان محمود کو نکالا گیا لیکن اس دوران وہ شدید زخمی ہوگیا جس کے باعث وہ بچ نہ سکا۔
ریسکیو اہلکار کا کہنا تھا کہ محمود کو بلینڈر سے نکالنے کے لیے 3 گھنٹے کا وقت لگا، لیکن جب اسے باہر نکالا گیا تو اس کی حاکت تشویشناک تھی۔
شہری دفاع اور فرسٹ ایڈ کی ٹیموں کی جانب سے نوجوان کو باہر نکالنے کے لیے جان توڑ کوششیں کی گئیں لیکن مشینیں اس کے جسم کا زیادہ تر حصہ جلا چکی تھیں۔
اسپتال کے ڈائریکٹر احمد العکور نے بتایا کہ اس نوجوان کی زندگی بچانے کے لیے تمام ممکنہ طبی سہولیات فراہم کی گئیں، لیکن نوجوان جسم کے مختلف حصوں میں گہری چوٹیں لگنے کی وجہ سے جان کی بازی ہار گیا۔
دوسری جانب سیکیورٹی سروسز کا یہ کہنا ہے کہ یہ اتفاقی حادثہ تھا یا کوئی مجرمانہ اقدام؟ یہ جاننے کے لیے ہماری ایک خصوصی ٹیم نے تحقیقات شروع کر دی ہیں۔
