’میرے بھالو کا آپریشن کردیں‘، ڈاکٹر نے بچے کی معصوم خواہش پوری کردی -
The news is by your side.

Advertisement

’میرے بھالو کا آپریشن کردیں‘، ڈاکٹر نے بچے کی معصوم خواہش پوری کردی

اوٹاوا: کینیڈا کے سرجن نے 8 سال کے معصوم بچے کی خواہش پوری کرنے کے لیے کھلونے کا آپریشن کیا اور لوگوں کے دل جیت لیے۔

تفصیلات کے مطابق کینیڈا کا 8 سالہ مائیک جیکسن مکائی نامی بچہ اپنی معصوم سی خواہش لے کر  ’ڈبلیو کے ہیلتھ سینٹر’ پہنچا اور اُس نے سرجن سے اپنے کھلونے ’بھالو‘ کا آپریشن کرنے کی ضد کی۔

بچے کا ڈاکٹر کو کہنا تھا کہ یہ ٹھیک طریقے سے سوتا نہیں لہذا آپ اس کا آپریشن کریں تاکہ اسے سکون مل سکے۔

ڈاکٹر نے مکائی کو قائل کرنے کی کوشش کی مگر وہ اسے سمجھا نہ سکا جس کے بعد ڈاکٹر ڈینیل مکنیلی نے بچے کی ضد پوری کرنے کے لیے کھلونے کے آپریشن کی حامی بھری۔

ڈینیل نے بھالو کو اسپتال میں داخل کیا اور پھر اُسے باقاعدہ بے ہوشی کی دوائی دے کر میز پر لیٹا دیا اور پھر ہاتھوں میں سرجری کے اوزار اٹھا کر آپریشن کیا۔

ڈاکٹر نے ڈرامائی سرجری کی تصاویر سوشل میڈیا پر شیئر کیں تو صارفین نے اُسے بہت پسند کیا اور دیکھتے ہی دیکھتے یہ وائرل ہوگئیں۔

ڈینیل نے تصاویر شیئر کرتے ہوئے لکھا کہ ایک ننھا مریض میرے پاس آیا اور اُس نے کہا کہ ’میرے بھالو کا آپریشن کردیں تاکہ یہ سکون سے سو سکے، میں اُس کو کس طرح انکار کرتا‘۔

ڈاکٹر کا کہنا تھا کہ ’میرا یہ اقدام بچے کو خوش کرنے کے لیے تھا تاکہ وہ مطمئن ہوجائے مگر لوگوں نے اسے بہت پسند کیا جو میرے لیے فخر کی بات ہے‘۔

اُن کا کہنا تھا کہ ’بھالو کا آپریشن مکمل ہوگیا جس کے بعد بچہ اپنے مریض کو گھر لے گیا اور اب وہ سکون سے سونے لگا ہے‘۔

Comments

comments

یہ بھی پڑھیں