میسوری : امریکی مارٹ میں ہونے والے گاہکوں کے درمیان جھگڑے کی ویڈیو نے دیکھنے والوں کو یہ سوچنے پر مجبور کردیا کہ ہمارے اندر برداشت کے مادے کا اتنا فقدان کیوں ہے؟
امریکہ میں ایک سپر اسٹور میں ہونے والی ہنگامہ آرائی نے دیکھنے والوں کو حیرت اور خوف میں مبتلا کردیا، خریداروں کے درمیان ہونے والی لڑائی اس قدر خوفناک تھی کہ پاس کھڑے لوگوں نے بھاگ کر جان بچائی۔
امریکی ریاست میسوری میں واقع والمارٹ کے اندر کچھ خریدار کسی بات پر اچانک گتھم گتھا ہوگئے اور دیکھتے ہی دیکھتے یہ جھگڑا خوفناک صورت اختیار کرگیا۔
جھگڑے کا یہ واقعہ گزشتہ رات فرگوسن کے نواحی علاقے سینٹ لوئس میں ویسٹ فلورینٹ ایونیو پر اسٹور کے سیلف چیک آؤٹ ایریا میں پیش آیا۔
Two family Walmart BRAWL 😡 #StopTheMaddness #Fight #crazyvideos pic.twitter.com/cjSOwLa2K3
— CrazyVideos (@CrazyVidKid) October 12, 2022
سوشل میڈیا پر وائرل ہونے والی اس ویڈیو میں دیکھا جاسکتا ہے کہ لڑائی کے دوران کچھ افراد نے حملہ آوروں کو مارنے کے لیے سلاخیں اٹھائیں اور شیشے کی بھاری اشیاء ایک دوسرے پر دے ماریں، یہاں تک کہ ایک شخص نے آگ بجھانے والے سلینڈر کا بھی استعمال کیا۔
رات نو بجے شروع ہونے والا پر تشدد جھگڑا کافی دیر تک چلتا رہا جس میں تقریباً دو درجن سے زائد لوگ شامل تھے، مارٹ کی انتظامیہ بھی ان کے سامنے بے بس دکھائی دی۔
مار دھاڑ کے خوفناک مناظر دیکھ کر وہاں موجود دیگر خریدار جو اپنے بچوں کے ہمراہ آئے ہوئے تھے خوفزدہ ہوگئے اور اپنی حفاظت کے لیے وہاں سے بھاگنے کی کوشش کی۔
جھگڑے کی یہ ویڈیو کسی نے موبائل کیمرے میں محفوظ کرلی جس میں لوگوں کو جارحانہ انداز میں ایک دوسرے کو لاتیں گھونسے مارتے اور زور زور سے کوستے ہوئے دیکھا جاسکتا ہے۔
اس حوالے سے مقامی پولیس حکام کا کہنا ہے کہ ہمارے آنے تک جھگڑا ختم ہو گیااور تمام افراد جاچکے تھے تاہم مارٹ کی طرف سے فراہم کردہ سی سی ٹی وی فوٹیج تلاش کر رہے ہیں تاکہ یہ معلوم کیا جاسکے کہ اصل میں کیا ہوا تھا۔