The news is by your side.

Advertisement

معاشی ترقی کو واپس لانا اب آسان نہیں: شہباز شریف

اسلام آباد: حزب اختلاف کے لیڈر شہباز شریف نے کہا ہے کہ ملک کی معیشت صفر ہو چکی ہے اور بہتری کی کوئی امید دکھائی نہیں دے رہی، اجتماعی دانش کو بھی بروئے کار لائیں تو معاشی ترقی کو واپس لانا آسان نہیں۔

شہباز شریف پارلیمانی پارٹی کے اجلاس سے خطاب کر رہے تھے، انھوں نے کہا پاکستان کی ترقی کو جس طرح تباہ کیاگیا، قوم کبھی معاف نہیں کرے گی، نواز شریف کی قیادت میں پاکستان معاشی لحاظ سے ٹیک آف کر گیا تھا لیکن اب معیشت صفر ہو چکی ہے۔

انھوں نے کہا پی ٹی آئی نے سابق 2 حکومتوں کے مجموعی قرضوں سے بھی زیادہ قرض لیا، سیاست میں شائستگی کا چلن ختم کر دیا، ایسی بازاری گفتگو کسی حکومت کے سربراہ نے نہیں کی تھی جو آج ہو رہی ہے، اب اجتماعی دانش کو بھی بروئے کار لائیں تو معاشی ترقی کو واپس لانا آسان نہیں۔

شہباز شریف کا کہنا تھا بطور پاکستانی سوچتا ہوں تو موجودہ حالات کو دیکھ کر رونگٹے کھڑے ہو جاتے ہیں، سوچتا ہوں کہ ملک کو مسائل کی اس دلدل سے کیسے نکالنا ممکن ہوگا، موازنہ کریں تو آج افغانستان بھی پاکستان سے آگے ہے، پاکستان کے حالات دیکھ کر ہر پاکستانی رنجیدہ ہے۔

ن لیگی رہنما نے کہا موجودہ حکومت سے بری اور بد ترین حکومت نہیں دیکھی، لیکن قوم ووٹ کے ذریعے اس کا حساب لے گی، موجودہ حکومت کے اقدامات کا زہریلا پھل آج قوم کھانے پر مجبور ہے۔

Comments

یہ بھی پڑھیں