مانچسٹر: برطانیہ نے اسرائیل کو اسلحے کی برآمدات پر جزوی پابندی لگانے کا اعلان کردیا، 30 لائسنس معطل کرنے کا بھی فیصلہ کیا گیا ہے۔
برطانیہ کی جانب سے اسرائیل کو اسلحہ برآمد کے 350 میں سے 30 لائسنس معطل کرنےکا فیصلہ کیا گیا ہے، لائسنس کی معطلی سے اسرائیل کو ڈرونز، ہیلی کاپٹرز اور ہوائی جہازوں کی فراہمی متاثر ہوگی۔
سیکریٹری خارجہ ڈیوڈ لیمی نے کہا کہ فیصلہ غزہ میں اسرائیل کے طرزعمل پر شدید تشویش کے بعد کیا گیا، اسرائیل کو برآمد ہتھیار انسانی حقوق کی خلاف ورزیوں میں استعمال ہوسکتے ہیں۔
برطانوی سیکرٹری خارجہ نے کہا کہ اسرائیل کے حماس کے خلاف دفاع کی حمایت کرتے ہیں، آزاد فلسطینی ریاست کیلئے دو ریاستی حل کے حامی ہیں۔
خیال رہے کہ امریکی صدر جوبائیڈن کا کہنا ہے کہ نیتن یاہو اسرائیلی قیدیوں کے معاہدے کو محفوظ بنانے کے لیے حتی الامکان کوششیں نہیں کر رہے۔
صدر بائیڈن نے کہا کہ انھیں یقین نہیں ہے کہ اسرائیل کے وزیر اعظم نیتن یاہو حماس کے ساتھ قیدیوں کے تبادلے کے معاہدے کو حاصل کرنے کے لیے کافی کوشش کر رہے ہیں۔
وائٹ ہاؤس میں صحافیوں سے بات کرتے ہوئے بائیڈن کا کہنا تھا کہ وہ غزہ میں قید یرغمالیوں کی رہائی کے معاہدے کے لیے حتمی تجویز پیش کرنے کے قریب ہیں۔
