برطانیہ میں 2024 کے اختتامی دن تن تنہا چور نے دیدہ دلیری کے ساتھ سال کی سب سے بڑی چوری کی کامیاب واردات کر لی۔
برطانوی اخبار گارجین کے مطابق برطانیہ میں سال کے آخری روز سینٹ جونز ووڈ پر ایک گھر میں چوری ہوئی جہاں تن تنہا چور اتنا سامان لوٹ کر فرار ہوا کہ وہ نہ صرف 2024 کی سب سے بڑی چوری قرار پائی بلکہ برطانیہ کی صدیوں قدیم تاریخ کی بڑی چوریوں میں شمار کی جا رہی ہے۔
رپورٹ کے مطابق چور مذکورہ گھر میں دوسری منزل سے داخل ہوا اور صرف 19 منٹ میں ایک کروڑ پاؤنڈ مالیت کے زیورات اور ڈیزائنر اشیا لے اڑا۔ ان چوری شدہ اشیا کی پاکستانی کرنسی میں مالیت 3 ارب روپے سے زائد بنتی ہے۔
چور نے گھر میں داخل ہو کر پانچ منٹ تک مختلف کمروں کی تلاشی لی۔ پہلی منزل پر جا کر قیمتی اشیا اور زیورات حاصل کیے اور اسی کھڑکی سے فرار ہوگیا۔
پولیس کے مطابق چوری ہونے والی اشیا میں انتہائی قیمتی اور منفرد زیورات، ہیرے جواہرات اور مگر مچھ کی کھال سے بنے بیگ سمیت کئی نادر اشیا شامل ہیں۔
واقعے کی اطلاع ملتے ہی پولیس اور تحقیقاتی ادارے جائے وقوعہ پر پہنچ گئے اور لندن پولیس کا کہنا ہے کہ سی ٹی وی کے مطابق چور کی عمر 20 سے 30 سال کے درمیان ہے۔
پولیس نے مشکوک سرگرمی یا چوری شدہ اشیا کی معلومات پر فوری اطلاع دینے کی اپیل کی ہے۔
دوسری جانب اس بڑی چوری کے متاثرہ ہانگ کانگ سے تعلق رکھنے والے خاندان کے متاثرہ خاندان کا اشیا واپس دلانے والے کیلیے 5 لاکھ پاؤنڈز (15 کروڑ روپے پاکستانی) انعام کا اعلان کیا ہے۔
