برطانیہ لگ بھگ دو صدیوں تک متحدہ ہندوستان پر قابض رہا اس دوران اس نے 64،820 ڈالر مالیت کا خزانہ لوٹ کر اپنے ملک منتقل کیا۔
ایسٹ انڈیا کمپنی کی صورت میں ہندوستان آنے والے برطانیہ نے 1757 میں متحدہ ہندوستان پر قبضہ کیا جو لگ بھگ دو صدیوں (190 برس) تک جاری رہا اور اس کا خاتمہ اگست 1947 میں پاکستان اور بھارت کے قیام کے ساتھ ختم ہوا۔
یہ برطانوی دور عدم مساوات، ظلم وجبر کی داستانوں اور ہندوستان کی دولت پر قابض ہونے اور اسے لوٹنے سے بھرا پڑا ہے۔
آکسفیم انٹرنیشنل نے 1765 سے 1900 کے درمیان صرف 135 سالوں کے دوران برطانوی استعمار کی جانب سے ہندوستان سے لوٹی گئی دولت سے متعلق رپورٹ جاری کی ہے، جس میں انکشاف کیا گیا ہے کہ برطانیہ نے اس دوران 64،820 امریکی ڈالر کے مساوی دولت لوٹی۔
رپورٹ میں بتایا گیا ہے کہ لوٹی گئی اس رقم میں سے نصف سے زائد 33،800 ارب ڈالر برطانیہ کے سب سے امیر 10 فیصد لوگوں کے پاس گئے جب کہ اس لوٹ مار سے اس دور کے نئے ابھرتے ہوئے متوسط طبقے نے بھی فائدہ اٹھایا۔
آکسفیم انٹرنیشنل کے مطابق تاریخی استعماری دور کے دوران ذات، مذہب، جنس، زبان اور جغرافیہ سمیت کئی دیگر تقسیموں کو پھیلایا گیا اور استحصال کیا گیا۔ انہیں ٹھوس شکل دی گئی اور پیچیدہ بنایا گیا۔
آکسفیم انٹرنیشنل نے کہا کہ تاریخی استعماری دور میں پائی جانے والی عدم مساوات اور لوٹ مار کی بگاڑ، جدید زندگی کو تشکیل دے رہی ہیں۔ اس نے ایک انتہائی غیر مساوی دنیا بنائی ہے، ایک ایسی دنیا جو نسل پرستی پر مبنی تقسیم سے دو چار ہے، ایک ایسی دنیا جو گلوبل ساؤتھ سے منظم طور پر دولت نکالتی رہتی ہے، جس کا فائدہ بنیادی طور پر گلوبل نارتھ کے سب سے امیر لوگوں کو ملتا ہے۔
آکسفیم انٹرنیشنل کے مطابق اگر لندن کے سطحی علاقے کو 50 برطانوی پاؤنڈ کے نوٹوں سے ڈھکا جائے تو مذکورہ بالا رقم ان نوٹوں سے 4 گنا زیادہ قیمت کی ہیں۔
واضح رہے کہ آکسفیم کی یہ رپورٹ ورلڈ اکنامک فارم (ڈبلیو ای ایف) کے سالانہ اجلاس سے کچھ گھنٹے قبل ’ٹیکرس، ناٹ میکرس‘ کے عنوان سے جاری کی گئی۔ اس رپورٹ میں کئی مطالعوں اور تحقیقی مقالوں کا حوالہ دیتے ہوئے دعویٰ کیا گیا ہے کہ ’’جدید ملٹی نیشنل کارپوریشن صرف استعمار کا نتیجہ ہیں۔
