پاکستان میں تعینات برطانوی ہائی کمشنر ڈاکٹر کرسچن ٹرنر بھی اپنی ٹیم کے ٹی 20 ورلڈ کپ کے فائنل میں پہنچنے پر خوشی سے نہال اور پُرجوش ہیں۔
برطانوی ہائی کشمنر ڈاکٹر کرسچن ٹرنر نے ٹی ٹوئنٹی ورلڈ کپ کے سیمی فائنل میں بھارت کو شرمناک شکست دے کر فائنل میں پہنچنے پر اپنی ٹیم انگلینڈ کی بھرپور ستائش کی ہے۔
کرسچن ٹرنر نے کہا ہے کہ سیمی فائنل میں ہیلز اور بٹلر نے حیرت انگیز بیٹنگ کی، ان کی بلے بازی دیکھ کر لگ رہا تھا کہ دونوں بابر اور رضوان کے موڈ میں ہیں، اب ایک پرفیکٹ فائنل کا انتظار ہے۔
برطانوی ہائی کمشنر نے ساتھ ہی کہا کہ کیا 1992 کی یاد تازہ ہوگئی؟ دیکھا جائے تو انگلش اور پاکستانی ٹیم گزشتہ ٹی ٹوئنٹی سیریز کے باعث ایک دوسرے کو اچھی طرح جانتے ہیں۔
ڈاکٹر کرسچن ٹرنر نے اس حوالے سے اپنی ایک ٹوئٹ میں چیئرمین پی سی بی کو بھی ٹیگ کیا ہے۔
واضح رہے کہ انگلینڈ نے گزشتہ روز آسٹریلیا میں کھیلے جا رہے ٹی 20 ورلڈ کپ کے دوسرے سیمی فائنل میں بھارت کو شرمناک شکست دے کر فائنل کے لیے کوالیفائی کیا ہے۔
اتوار کو میلبرن میں پاکستان اور انگلینڈ کے مابین فائنل ہوگا جس کو دنیائے کرکٹ میں 1992 کے ورلڈ کے ری پلے سے تشبیہہ دی جا رہی ہے۔
