اسلام آباد : برٹش امریکن ٹوبیکو گروپ کے ریجنل ڈائریکٹر مائیکل ڈیجوائنسیک نے خبردار کیا ہے کہ پاکستان کو سگریٹ ٹیکس چوری سے سالانہ 300 ارب سےزائد کا نقصان ہورہا ہے، اگر صورتحال اسی طرح رہی تو غیر ملکی سرمایہ کاری ختم ہوجائے گی۔
تفصیلات کے مطابق برٹش امریکن ٹوبیکو گروپ کے ریجنل ڈائریکٹر مائیکل ڈیجوائنسیک نے میڈیا سے غیر رسمی گفتگو کرتے ہوئے کہا کہ ایس آئی ایف سی کوبرٹش امریکن ٹوبیکوگروپ کی سرمایہ کاری پلان سےآگاہ کیا ، ایس آئی ایف سی سرمایہ کاری کیلئےتحفظات دور کرنےمیں مخلص ہے۔
مائیکل ڈیجوائنسیک کا کہنا تھا کہ پاکستان میں غیرقانونی سگریٹ کافروغ غیرملکی سرمایہ کاری کومتاثرکرے گا، غیر قانونی تجارت کے باعث سگریٹ کے غیرملکی سرمایہ کار تباہ ہورہے ہیں۔
برٹش امریکن ٹوبیکو گروپ کے ریجنل ڈائریکٹر نے کہا کہ غیر ملکی سرمایہ کاری بڑھانے کیلئےپالیسی میں تسلسل ضروری ہے، ایک سال میں غیرقانونی اور ٹیکس چور سگریٹ کا حصہ 20 فیصد بڑھا۔
انھوں نے بتایا کہ سال 2011 میں پاکستان میں غیر قانونی اور ٹیکس چور سگریٹ کا حصہ 22 فیصد تھا ، جو اب 2024 میں پاکستان میں غیر قانونی اور ٹیکس چور سگریٹ کا حصہ 56 فیصد ہے، مائیکل ڈیجوائنسیک
مائیکل ڈیجوائنسیک نے خبردار کیا کہ حکومت کو سالانہ 300 ارب سےزائد کا نقصان سگریٹ ٹیکس چوری سے ہو رہا ہے ، غیر قانونی اور ٹیکس چور سگریٹ اسی طرح رہے تو غیر ملکی سرمایہ کاری ختم ہوجائے گی۔
