پاکستان میں ملٹری کورٹس سے 25 شہریوں کو سزائیں سنائے جانے پر برطانوی حکومت نے دردعمل کا اظہار کیا ہے۔
ترجمان برطانوی وزارت خارجہ نے بیان میں کہا ہے کہ ملٹری کورٹس سے سویلین کے ٹرائل میں شفافیت اور آزادانہ جانچ کا فقدان ہے فوجی ٹرائل منصفانہ ٹرائل کےحق کو نقصان پہنچاتا ہے۔
ترجمان نے کہا کہ برطانیہ پاکستان کی خودمختاری کا احترام کرتا ہے پاکستان شہری اور سیاسی حقوق کے عالمی معاہدے کے تحت ذمہ داریوں کو نبھائے۔
جن سویلینز کا ملٹری ٹرائل ہوا ہے انھیں انصاف دلائیں گے
پاکستان تحریک انصاف کے سیکریٹری اطلاعات شیخ وقاص اکرم نے کہا ہے کہ جن سویلینز کا ملٹری ٹرائل ہوا ہے انھیں انصاف دلائیں گے۔
پریس کانفرنس کرتے ہوئے شیخ وقاص کا کہنا تھا کہ پاکستان میں سویلین کا ملٹری ٹرائل ہورہا ہے، پاکستان کے آئین اور عالمی قوانین کی بھی خلاف ورزی کی جارہی ہے، پی ٹی آئی کا مؤقف رہا ہے سویلین کا ملٹری ٹرائل نہیں ہونا چاہیے۔
ملٹری کورٹس میں 25 سویلین کو سزا سنائی گئی ہیں، یورپی یونین نے بھی سویلین کے ملٹری کورٹس میں ٹرائل پر تحفظات کا اظہار کیا، یورپی یونین کی جانب سے جی ایس پی پلس اسٹیٹس پر بھی بات کی گئی۔
شیخ وقاص اکرم نے کہا کہ کالعدم تنظیموں کیخلاف ملٹری کورٹ ٹرائل کیلئے ترمیم لائی گئی تھی، موجودہ حکومت کو بھی چاہیے تھا کہ آئینی ترمیم کرلیتے۔
انھوں نے کہا کہ ملٹری قوانین میں ترمیم دہشت گردوں کے لئے کی گئی تھی، پاکستان تحریک انصاف کوئی دہشت گرد جماعت نہیں۔
