پاکپتن: صوبہ پنجاب میں راستے کے تنازع پر بھائی نے ساتھیوں کے ہمراہ تیز دھار آلے سے بھائی کی آنکھیں نکال دیں۔
تفصیلات کے مطابق دوستوں کے ساتھ مل کر بھائی نے بھائی پر شدید تشدد کیا اور تیز دھار آلے سے آنکھیں نکال دیں، کلہاڑیوں کے وار سے ٹانگیں بھی توڑ دیں۔
پاکپتن تھانہ رنگشاہ کے علاقے گائوں واں شیر سنگھ کے 35 سالہ رہائشی محمد مصطفی ولد اشرف کا اپنے بھائی کے ساتھ راستے کا تنازعہ چل رہا تھا۔
محمد مصطفی رقبہ سے واپس آ رہا تھا کہ اس کے بھائی نے ساتھیوں کے ہمراہ اس کو روک کر تشدد کا نشانہ بنایا، دوران تشدد ملزمان نے تیز دھار آلے سے مصطفی کی آنکھیں نکال دیں اور کلہاڑی سے وار کر کے ٹانگیں توڑ ڈالیں۔
مصطفی کو تشویشناک حالت میں ٹی ایچ کیو عارفوالا منتقل کر دیا گیا ہے، اسپتال ذرائع کے مطابق نوجوان کی ایک آنکھ ضائع ہونے کی تصدیق کی گئی جبکہ دوسری آنکھ کے متعلق فیصلہ کل میڈیکل بورڈ کرے گا۔
پولیس کا کہنا ہے کہ درخواست موصول ہوتے ہی کارروائی کریں کے۔
خیال رہے کہ جون 2016 میں خانیوال میں راستے کا تنازع پیش آیا تھا، پولیس کو درخواستیں دینے پر مقامی زمیندار نے ساتھیوں سمیت گھر میں گھس کر خاتون کے بال کاٹے اور تشدد کا نشانہ بناتے رہے کپڑے بھی پھاڑ دیئے تھے۔
