The news is by your side.

Advertisement

سگے بھائیوں نے بہن کی آنکھوں میں تیزاب ڈال دیا

جھنگ: صوبہ پنجاب کے شہر جھنگ میں سگے بھائیوں نے شقی القلبی کا بدترین مظاہرہ کرتے ہوئے اپنی شادی شدہ بہن کی آنکھوں میں تیزاب ڈال دیا۔

اے آر وائی نیوز کے مطابق جھنگ میں سگے بھائیوں نے دوسری شادی کرنے والی اپنی بہن شہناز مائی کی آنکھوں میں تیزاب ڈال دیا، بھائیوں نے ان کے شوہر اور بیٹے کو بھی اغوا کر لیا ہے۔

خاتون شہناز مائی انصاف کے لیے لاہور ہائی کورٹ پہنچ گئی، جہاں جج نے ان کے شوہر اور بچے کی بازیابی کا حکم دے دیا۔

رپورٹ کے مطابق خاتون شہناز مائی نے اپنے خاوند اور 2 سالہ بچے کی بازیابی کے لیے لاہور ہائی کورٹ میں درخواست دائر کی ہے، جس میں خاتون نے مؤقف اختیار کیا ہے کہ پہلے خاوند کی وفات کے بعد مرضی سے مظہر عباس سے شادی کی تھی۔

انھوں نے بتایا کہ 10 روز قبل بھائیوں نے مجھے خاوند اور بیٹے سمیت اغوا کر لیا، بھائیوں نے تشدد کے بعدمیری آنکھوں میں تیزاب بھی ڈال دیا جس سے ایک آنکھ ضائع ہو گئی ہے۔

درخواست گزار خاتون کے مطابق تیزاب سے ان کا بیٹا فرمان حیدر بھی جھلس گیا ہے اور وہ زخمی ہے۔

خاتون کا کہنا تھا کہ وہ بھائیوں کی قید سے بھاگ کر جھنگ سے لاہور آ گئی ہیں، تاہم شوہر اور بیٹا تاحال بھائیوں کے پاس قید ہیں۔ خاتون نے عدالت سے استدعا کی کہ ان کے شوہر اور بیٹے کو بھائیوں کی قید سے بازیاب کرایا جائے۔

جسٹس شہرام سرور چوہدری نے ایس ایچ او شورکوٹ اور احمد پور سیال کو خاتون کے شوہر اور بچے کو بازیاب کراتے ہوئے عدالت میں پیش کرنے کا حکم دے دیا ہے۔

Comments

یہ بھی پڑھیں