اسلام آباد: وفاقی بجٹ 24-2023 میں نیکٹا اتھارٹی کے ہیڈ کوارٹر اور ایف آئی اے اکیڈمی کی تعمیر کے لیے بھاری رقم مختص کرنے کی تجویز دی گئی ہے۔
تفصیلات کے مطابق وفاقی بجٹ 24-2023 میں اسلام آباد کی جیل کے لیے 69 کروڑ 63 لاکھ روپے کی گرانٹ مختص کرنے کی تجویز دی گئی ہے۔
وفاقی بجٹ میں نیشنل پولیس اسپتال کے لیے 1 ارب 40 کروڑ روپے اور ایف آئی اے سائبر کرائم کو جدید خطوط پر استوار کرنے کے لیے 30 کروڑ روپے کی گرانٹ تجویز کی گئی ہے۔
وفاقی دارالحکومت میں نیکٹا اتھارٹی کا ہیڈ کوارٹر بنانے کا فیصلہ کیا گیا ہے، بجٹ میں نیکٹا اتھارٹی ہیڈ کوارٹر کے لیے اراضی کی خریداری اور عمارت کے لیے 10 کروڑ روپے کی تجویز دی گئی ہے۔
دیہی علاقوں میں لینڈ ریکارڈ کمپیوٹرائزڈ کرنے کے لیے 1 کروڑ روپے رکھنے کی تجویز دی گئی ہے، غیر ملکیوں کی سیکیورٹی اور دیگر مراعات کے لیے 10 کروڑ روپے، زون 4 میں ایف آئی اے اکیڈمی، ٹریننگ اور ہاسٹل کی تعمیر اور اراضی کے لیے 8 کروڑ روپے مختص کرنے کی تجویز دی گئی ہے۔
محفوظ ترین اسلام آباد اور اسمارٹ کاروں کے ذریعے نگرانی کے لیے 11 کروڑ 27 لاکھ روپے، اور آئی بی ایم ایس فیز 2 کے لیے بھی 30 کروڑ روپے کی گرانٹ مختص کرنے کی تجویز دی گئی ہے۔
