اسلام آباد: وزارت خزانہ نے بجٹ 26-2025 سے قبل وفاقی ترقیاتی بجٹ پر سرنڈر آرڈرز کے ذریعے نظرثانی کا فیصلہ کر لیا۔
ذرائع نے اے آر وائی نیوز کو بتایا کہ وزارت خزانہ نے نظرثانی شدہ پبلک سیکٹر ڈیولپمنٹ پروگرام (پی ایس ڈی پی) سے زیادہ ترقیاتی فنڈز واپس مانگ لیے، یہ فیصلہ مالی سال 25-2024 کے آڈٹ اعتراضات سے بچنے کے تناظر میں کیا گیا ہے۔
اس سلسلے میں وزارت خزانہ نے فیصلے پر عملدرآمد کیلیے تمام وفاقی وزارتوں اور ڈویژنز کو مراسلہ جاری کر دیا۔
یہ بھی پڑھیں: تنخواہ دار طبقے کا احساس ہے آنیوالے بجٹ میں جائزہ لیں گے، محمد اورنگزیب
رواں مالی سال کیلیے ابتدا میں 1400 ارب روپے کا وفاقی ترقیاتی پروگرام منظور کیا گیا تھا جبکہ وزارتوں اور ڈویژنز نے اسی حساب سے متعلقہ ڈیمانڈ آرڈرز اور گرانٹس جمع کروائیں۔ بعدازاں مالی سال 25-2024 کا پی ایس ڈی پی 1100 ارب کیا گیا۔
ذرائع کے مطابق اب سرنڈر آرڈرز کے ذریعے وفاقی ترقیاتی بجٹ پر نظرثانی کا فیصلہ کیا گیا ہے۔ مراسلے میں ترجیحی بنیادوں پر سرنڈر آرڈرز وزارت خزانہ کے حق میں جاری کروانے کا کہا گیا ہے، نظرثانی پی ایس ڈی پی سے زائد فنڈز سرنڈر یا ایڈجسٹمنٹ کی جائے گی۔
وفاقی حکومت بجٹ 26-2025 کیلیے عالمی مالیاتی فنڈ (آئی ایم ایف) کے ساتھ مل کر تیاری کر رہی ہے۔ گزشتہ ماہ وزیر خزانہ محمد اورنگزیب نے اپنے بیان میں کہا تھا کہ اس بار حکومت ایسا بجٹ لائے گی جو روزگار اور ترقی لائے گا۔
پاکستان چیمبرآف کامرس اینڈانڈسٹری کے وفد سے ملاقات کے دوران محمد اورنگزیب نے کہا تھا کہ بجٹ کی تیاری ملک بھر کے ایوان ہائے صنعت و تجارت میں ہوگی اور بجٹ میں ایوان ہائے صنعت و تجارت کی تجویز ان کی زبانی سننا چاہتا ہوں۔
