اسلام آباد : ریئل اسٹیٹ سے وابستہ افراد کے لئے اہم خبر آگئی ، پراپرٹی کی فروخت پر کیپٹل گین ٹیکس کی شرح میں اضافے کا امکان ہے۔
تفصیلات کے مطابق آئندہ مالی سال کے بجٹ 26- 2025 میں ریئل اسٹیٹ پر کیپٹل گین ٹیکس بڑھانے پر غور کیا جا رہا ہے۔
ذرائع نے کہا کہ پراپرٹی کی فروخت پر کیپٹل گین ٹیکس کی شرح میں 20 فیصد اضافہ ہوسکتا ہے، کیپٹل گین ٹیکس کی شرح پندرہ سے بڑھ کر پینتیس فیصد تک ہوسکتی ہے۔
ذرائع نے بتایا کہ پاکستان اور آئی ایم ایف میں ورچوئل مذاکرات کے پہلے روز دو سیشنز ہوئے، آئندہ بجٹ میں ٹیکس ٹوجی ڈی پی کا ہدف گیارہ فیصد رکھے جانے پر غور کیا جا رہا ہے۔
ذرائع نے مزید کہا کہ ریئل اسٹیٹ کے کیپٹل گین ٹیکس کو کارپوریٹ سیکٹر کے مساوی لانے کی کوشش ہے، ورچوئل اجلاس میں ریئل اسٹیٹ کیپٹل گین ٹیکس بڑھانے پر بات چیت کی گئی۔
ذرائع کے مطابق آئندہ مالی سال کے بجٹ میں چار سو ارب روپے ٹیکس اقدامات کیے جاسکتے ہیں، ریئل اسٹیٹ سیکٹر میں ٹیکس آمدن گنجائش سےکم حاصل ہورہی بڑھانےکی ضرورت ہے۔
کیپٹل گین ٹیکس کی شرح بڑھانے کا اطلاق اسٹاک مارکیٹ کے شیئرز کی آمدن پر نہیں ہوگا۔
یاد رہے وزیر اعظم شہباز شریف نے ٹیکس نیٹ کو وسیع کرنے کے لیے اقدامات پر زور دیتے ہوئے متعلقہ حکام کو ہدایت کی تھی کہ ٹیکس چوری میں ملوث افراد اور شعبوں کے خلاف سخت کارروائی کی جائے۔
وزیر اعظم نے ٹیکس چوروں کی مدد کرنے والے افسران اور اہلکاروں کے کڑے احتساب کی بھی ہدایت کی۔
