کراچی : بجٹ 26-2025 پر تاجر برادری نے حکومت کو خبردار کرتے ہوئے کہا تاجرمخالف بجٹ سے گریز کیا جائے ورنہ سڑکوں پرہوں گے۔
تفصیلات کے مطابق صدر آل پاکستان انجمن تاجران اجمل بلوچ نے بجٹ 26-2025 کے حوالے سے تجاویز پیش کردیں۔
جس میں کہا گیا ہے کہ ترمیمی ٹیکس آرڈینس اور ڈیجیٹل انوائسنگ کو بجٹ سے نکالا جائے، ترمیمی آرڈیننس کے ساتھ کاروبار کرنا مشکل ہو جائے گا ، ترمیمی آرڈینس سے تاجر اپنے اکاؤنٹس میں رقم نہیں رکھ سکیں گے۔
صدر آل پاکستان انجمن تاجران کا کہنا تھا کہ ایف بی آر فائلرز پر ٹیکس بڑھا کر ناانصافی کر رہا ہے، بینکنگ ٹرانزیکشن پر ٹیکس کی اسکیم پہلے ہی ناکام ہو چکی ہے۔
انھوں نے مزید کہا کہ کریڈٹ کارڈ کے بغیر پٹرول پر3 روپے کٹوتی ختم کی جائے۔
مزید پڑھیں : آئندہ مالی سال 26-2025 کا وفاقی بجٹ آج پیش کیا جائے گا
آل پاکستان انجمن تاجران کے صدر نے کہا کہ ڈیجیٹل انوائسنگ سے تاجروں پر 50 ہزار روپے ماہانہ بوجھ پڑے گا اور ڈیجیٹل انوائسنگ کرپشن کی نئی راہ کھولے گی۔
تاجر برادری کا کہنا تھا کہ پوائنٹ آف سیل سسٹم کرپشن کا ذریعہ بن چکا ہے، بجٹ میں تاجروں سے متعلق ٹیکنیکل زبان کا استعمال نہ کیا جائے۔
اجمل بلوچ نے خبردار کیا پاکستانی کاروباری طبقے کو مدِنظر رکھ کر بجٹ بنایا جائے اور تاجر مخالف بجٹ سے گریز کیا جائے ورنہ سڑکوں پر ہوں گے۔
