اسلام آباد: آئندہ مالی سال وزارت داخلہ کے جاری منصوبوں کے لیے 7 ارب 90 کروڑ 84 لاکھ روپے مختص کیے گئے ہیں۔

تفصیلات کے مطابق وزارت داخلہ کے بجٹ کی تفصیلات بھی جاری کی گئی ہیں، آئندہ مالی سال وزارت داخلہ کی نئی اسکیموں کے لیے 5 ارب روپے مختص کیے گئے ہیں، اسلام آباد سیف سٹی کی توسیع کے لیے 3 ارب روپے، اسلام آباد انفراسٹرکچر ڈیولپمنٹ کے لیے 2 ارب روپے مختص کرنے کی تجویز ہے۔

سندھ میں 13 نئے پاسپورٹ دفاتر کی تعمیر کے لیے 36 کروڑ 86 لاکھ، سیکٹر ایچ 16 میں ماڈل جیل کی تعمیر کے لیے ایک ارب 18 کروڑ، اسلام آباد پولیس میں مینجمنٹ تبدیلی یونٹ کے قیام کے لیے 5 کروڑ 15 لاکھ، اسلام آباد انٹگریٹڈ بارڈر مینجمنٹ سسٹم کے لیے 37 کروڑ 72 لاکھ روپے مختص کرنے کی تجویز ہے۔

مالی سال 2025-26 کا بجٹ پیش، تنخواہ داروں کیلیے ریلیف کا اعلان

میٹرو بس کے اسلام آباد ایئرپورٹ تک آپریشن کے لیے 42 کروڑ 40 لاکھ، پاسپورٹ کے لیے بائیو میٹرک شناخت سسٹم کی اپ گریڈیشن کے لیے 20 کروڑ، آئندہ مالی سال میں نیشنل پولیس اسپتال اسلام آباد کے لیے 10 کروڑ روپے مختص کیے جانے کی تجویز ہے۔

اسلام آباد کے دیہاتی علاقوں میں رین واٹر ہارویسٹنگ کے لیے 4 کروڑ، اسلام آباد کے ترقیاتی پیکج کے لیے 2 ارب، اسلام آباد کے دیہاتی علاقوں میں لینڈ ریونیو ریکارڈز کے لیے 5 کروڑ، نیشنل فارنزک اینڈ سائبر کرائم ایجنسی کے لیے 10 کروڑ، وزارت داخلہ کے ڈیجیٹل اکانومی کے منصوبے کے لیے 2 ارب 59 کروڑ مختص کیے گئے ہیں۔