ریوڈی جنیرو: برازیل کے شہر ریوڈی جنیرو میں لال بیگوں کو مارنے کی کوشش میں دھماکا ہوا جس کے نتیجے میں گھر کا لان تباہ ہوگیا۔
تفصیلات کے مطابق عام طور پر لال بیگ اور چھپکلیوں کو مارنے کے لیے عوام کی جانب سے اسپرے کا استعمال کیا جاتا ہے لیکن برازیل میں ایک شخص نے لال بیگوں کو مارنے کے لیے دھماکے سے گھر کا لان ہی تباہ کردیا۔
ڈیلی میل کی رپورٹ کے مطابق برازیل کے دارالحکومت ریوڈی جنیرو میں سیزرشومٹنز نامی شخص کے گھر کے لان میں لال بیگ کی بڑی تعداد نے حملہ کیا تو اس نے انہیں جلانے کی ٹھان لی اور لان میں ایندھن پھیلا کر ماچس سے اسے آگ لگادی۔
سیزر شومٹنز کی لال بیگوں کو مارنے کی کوشش تو کامیاب ہوگئی لیکن پورا ہرا بھرا لان ہی دھماکے سے اڑ گیا۔
اس موقع پر لان میں موجود 2 پالتو جانور بھی اپنی جان بچاتے ہوئے بھاگ کھڑے ہوئے جبکہ آگ لگانے والا شخص خوش قسمتی سے محفوظ رہا۔
برازیلی شہری کی اس عجیب و غریب حرکت کی ویڈیو گھر کے سی سی ٹی وی کیمرے میں محفوظ ہوگئی، ویڈیو میں دیکھا جاسکتا ہے کہ کس طرح مذکورہ شخص لال بیگوں کو مارنے کے لیے ماچس جلا کر آگ لگا رہا ہے۔
ویڈیو میں دیکھا جاسکتا ہے کہ سیزرشو نے پہلے دو مرتبہ ماچس جلا کر مذکورہ جگہ پر پھینکی لیکن وہ ناکام رہا تاہم تیسری بار زور دار دھماکا ہوا۔
اڑتالیس سالہ سیزرشومٹنز ٹرک ڈرائیور ہے اس کا کہنا تھا کہ میری اہلیہ نے گارڈن میں لال بیگوں کی موجودگی کی شکایت کی تھی میں نے انہیں ٹھکانے لگانے کی ٹھان لی تھی۔
