افریقی ملک برکینا فاسو میں حالات انتہائی کشیدہ ہوگئے، دہشت گردی کی تازہ لہر میں شدت پسندوں نے حملہ کرکے 53 فوجیوں کو موت کی نیند سلا دیا جبکہ متعدد کو زخمی بھی کردیا۔
بین الاقوامی خبر رساں ادارے کی رپورٹ میں بتایا گیا ہے کہ شدت پسندوں کے حملے میں مرنے والوں میں 17 فوجی اور 36 شہری رضا کار فوجی شامل ہیں، شدت پسندوں کے حملے میں 30 سکیورٹی اہلکار زخمی بھی ہوئے۔
برکینا فاسو کی فوج کی جانب سے جاری کردہ بیان کے مطابق جوابی حملے میں شدت پسندوں کے بیشتر جنگجوؤں کو ہلاک کردیا گیا ہے، تاہم اس حوالے سے مزید معلومات فراہم کی جارہی ہیں۔
یاد رہے کہ اس سے قبل برکینا فاسو میں 28 افراد کی گولیاں مار قتل کر دیا گیا تھا،حکام کا کہنا تھا کہ اس حوالے سے تحقیقات کررہے ہیں تاہم ابھی تک کوئی پیش رفت سامنے نہیں آسکی ہے۔
گزشتہ ایک دہائی سے مشرقی افریقی ملک برکینا فاسو انتہاپسندی اور دہشتگردی کی لپیٹ میں ہے، دہشتگردی کے خلاف جنگ کے دوران اب تک ہزاروں شہری اور سینکڑوں فوجی ہلاک جبکہ لاکھوں افراد یہاں سے ہجرت کرکے بیرون ممالک جاچکے ہیں۔
برکینا فاسو کے حکام کی جانب سے اکثر یہ بیانیہ سامنے آتا ہے کہ حالات کنٹرول میں ہیں تاہم صورتحال اس کے برعکس ہے۔
