The news is by your side.

Advertisement

برازیل میں بس اور ٹرک کے درمیان ہولناک تصادم، بس پل سے نیچے جا گری

برازیل میں ایک بس اور ٹرک کے درمیان ہولناک تصادم میں 16 افراد ہلاک ہوگئے، پل کے جنگلے سے ٹکرانے کے بعد بس 45 فٹ نیچے جا گری۔

مقامی میڈیا رپورٹس کے مطابق ہولناک حادثہ جاؤ مونلواڈ شہر میں پیش آیا جہاں ایک پل پر ٹرک اور بس میں تصادم ہوا۔

ٹرک سے ٹکرا کر بس لین سے نکل گئی اور پل کے کنکریٹ جنگلے سے ٹکرائی، بعد ازاں وہاں سے 45 فٹ نیچے ریلوے ٹریک پر جا گری۔

نیچے گرنے سے قبل بس کا ڈرائیور بس سے نکل آیا تھا جبکہ صرف چند لمحے قبل مزید 4 مسافر بھی بس سے چھلانگ لگا کر باہر نکلے، اگلے ہی لمحے بس نیچے جا گری۔

موقع پر جمع ہوجانے والے افراد نے 2 بچوں سمیت 3 مسافروں کو کسی طرح اوپر کھینچ لیا جنہیں فوری طور پر قریبی اسپتال روانہ کیا گیا۔

ہولناک حادثے میں 16 افراد ہلاک جبکہ 27 زخمی ہوئے۔

اسی نوعیت کا ایک حادثہ ساؤ پاؤلو میں گزشتہ ہفتے ہی پیش آیا تھا جس میں ایک ٹرک اور بس کا ہی تصادم ہوا تھا، مذکورہ حادثے میں 40 افراد موقع پر ہی ہلاک ہوگئے تھے جبکہ 2 مزید ہلاکتیں اسپتال میں ہوئی تھیں۔

Comments

یہ بھی پڑھیں