اسلام آباد : بانی پی ٹی آئی کی اہلیہ بشریٰ بی بی دوران سماعت روسٹرم پر روپڑیں اورکہا میں اب اس عدالت نہیں آؤں گی، یہاں ناانصافیاں ہوتی ہیں۔
تفصیلات کے مطابق ڈسٹرکٹ اینڈ سیشن کورٹ میں بانی پی ٹی آئی کی چھ اور اہلیہ کی ایک مقدمے میں ضمانت کی درخواست پر سماعت ہوئی۔
دوران سماعت بشریٰ بی بی روسٹرم پر آئیں اور آبدیدہ ہوگئیں اور کہا نو ماہ سے ناانصافیاں دیکھ رہی ہوں، بانی پی ٹی آئی اور مجھے ناانصافی کی بنیاد پر سزا دی گئی، انصاف تو ہے ہی نہیں میں انصاف کیلئے نہیں آئی۔
سابق خاتون اول کا کہنا تھا کہ میرا کمبل اور دیگرسامان گاڑی میں ہے، جب کہیں گے جیل جانے کو تیار ہوں، وکلا صرف وقت ضائع کرتے ہیں، جو شخص جیل میں بیٹھا ہے کیا وہ انسان نہیں، میں اب اس عدالت نہیں آؤں گی، یہاں ناانصافیاں ہوتی ہیں۔
عدالت نے بانی پی ٹی آئی کی چھ اور بشریٰ بی بی کی ایک مقدمے میں ضمانت کی درخواست پر فیصلہ محفوظ کرلیا، جو اٹھارہ نومبر کو سنایا جائے گا۔
عدالت نے بانی پی ٹی آئی کی درخواستوں پر دلائل طلب کرلیے اور کہا بانی پی ٹی آئی اور اہلیہ کی درخواستوں پرفیصلہ ایک ساتھ سنایا جائےگا۔
عدالت نے آئندہ سماعت پر بانی پی ٹی آئی کی وڈیو لنک کے ذریعے حاضری یقینی بنانے کا حکم دیتے ہوئے کہا بانی پی ٹی آئی کو پیش نہ کیا تو جیل سپرنٹنڈنٹ کو اِدھر کھڑا ہونا پڑے گا۔
