اسلام آباد : چیئرمین پی ٹی آئی کے وکیل نعیم پنجوتھا کا کہنا ہے کہ بشریٰ بی بی آج چیئرمین پی ٹی آئی سے ملاقات کیلئے اٹک جیل جائیں گی۔
تفصیلات کے مطابق چیئرمین پی ٹی آئی کے وکیل نعیم پنجوتھا نے سماجی رابطے کی ویب سائٹ ٹوئٹر پر اپنے بیان میں کہا کہ آج بشریٰ بی بی کے ہمراہ ڈسٹرکٹ کورٹ اسلام آباد پیش ہوں گی ، چیئرمین پی ٹی آئی اور بشریٰ بی بی کے مختلف کیسز لگے ہوئے ہیں۔
نعیم پنجوتھا کا کہنا تھا کہ بشریٰ بی بی آج چیئرمین پی ٹی آئی سےملاقات کیلئےاٹک جیل بھی جائیں گی۔
یاد رہے گذشتہ ہفتے اسلام آباد ہائی کورٹ نے چیئرمین پی ٹی آئی کی اڈیالہ جیل منتقلی، سہولیات اورملاقات کی درخواست پر تحریری حکمنامہ جاری کیا تھا۔
حکمنامے میں عدالت نے جیل حکام کو ہدایت کی تھی کہ چیئرمین پی ٹی آئی کی دوستوں، فیملی اور وکلاء سے ملاقات کروائیں۔
عدالت کا کہنا تھا کہ ایسا کچھ ریکارڈ پر نہیں، جو قیدی کو ہفتے میں ایک سے زائد بار ملاقات سے روکے، چیئرمین پی ٹی آئی کو جائے نماز اور انگلش ترجمے کیساتھ قرآن مجید دیا جائے اور مناسب طبی سہولیات بھی فراہم کی جائیں۔
خیال رہے 10 اگست کو ڈسٹرکٹ جیل میں بشریٰ بی بی نے چیئرمین پی ٹی آئی سے ملاقات کی تھی ، ملاقات آدھا گھنٹہ جاری رہی تھی۔
بعد ازاں چیئرمین پی ٹی آئی کے وکیل نعیم حیدر پنجوتھہ کا کہنا تھا کہ بشریٰ بی بی نے بتایا چیئرمین پی ٹی آئی خیریت سے ہیں۔
