کراچی کے علاقے الفلاح میں رئیل اسٹیٹ کا کام کرنے والے تاجر کے بیٹے کے قتل کا معمہ حل کرلیا گیا۔
اے آر وائی نیوز کے مطابق کاؤنٹر ٹیرر ازم ڈیپارٹمنٹ (سی ٹی ڈی) حکام کا کہنا ہے کہ کراچی کے علاقے الفلاح میں 2 ملزمان نے گاڑی میں سوار نوجوان کو قتل کیا تھا، فائرنگ کی سی سی ٹی فوٹیج بھی سامنے آگئی۔
سی ٹی ڈی حکام کا کہنا ہے کہ دوران تفتیش انکشاف ہوا کہ مقتول کو والد کے بزنس پارٹنر راؤ اقبال نے قتل کرایا۔
پولیس کا کہنا ہے کہ تاجر اور ان کے بیٹے کو راؤ اقبال کے فراڈ کا علم ہوگیا تھا اسی وجہ سے ملزم نے ساتھی حفیظ کے ذریعے مقتول محمد رضا ذوالفقار کو قتل کروایا۔
پولیس حکام کے مطابق ملزمان نے 7 سے 8 لاکھ روپے دے کر تاجر کے بیٹے کو قتل کیا، اجرتی قاتل اجمل پاپڑی نے ساتھی حمزہ سے مل کر قتل کیا۔
ملزم اجمل پاپڑی نے اپنے ہی ساتھی حمزہ کو بھی خانیوال لے جا کر قتل کردیا تاکہ قتل کے تمام ثبوت مٹائے جاسکیں۔
سی ٹی ڈی حکام کا کہنا ہے کہ مقتول کے والد پراپرٹی کا کام کرتے ہیں۔
پولیس کے مطابق ملزم اجمل پاپڑی اور ہلاک ملزم حمزہ عادی جرائم پیشہ ہیں جو کراچی اور پنجاب میں ڈکیتی اور قتل کے مقدمات میں پہلے بھی گرفتار ہوچکے ہیں، واقعے کی مزید تفتیش جاری ہے۔
