کراچی : شارع فیصل عوامی مرکز کے قریب باراتیوں سے بھری بس الٹ گئی، جس کے نتیجے میں ایک خاتون جاں بحق اور 16 افراد زخمی ہوگئے۔
واقعے کی اطلاع ملتے ہی پولیس اور ریسکیو ادارے کے کارکنان جائے وقوعہ پر پہنچ گئے، ریسکیو حکام نے بتایا ہے کہ حادثے میں ایک خاتون نے موقع پر ہی دم توڑ دیا جبکہ بس الٹنے سے مردوں خواتین اور بچوں سمیت 16افراد زخمی ہوئے۔
اس حوالے سے واقعے کے عینی شاہد اور شہری مبشر نے بتایا کہ حادثہ ڈرگ روڈ سے محمود آباد جاتے ہوئے پیش آیا،حادثے میں ایک سفید رنگ کی کار کو بھی شدید نقصان پہنچا۔
مبشر کے مطابق حادثہ ایک کار کے اوور ٹیک کرنے کے باعث پیش آیا، باراتیوں کی کوسٹر اپنی لائن میں جارہی تھی کہ اوور ٹیک کرنے والی گاڑی کو بچاتے ہوئے حادثے کا شکار ہوئی۔
ریسکیو حکام کے مطابق حادثے میں جاں بحق ہونے والی خاتون کی شناخت 27 سالہ نادیہ کے نام سے کی گئی جبکہ زخمیوں میں 27 سالہ آصفہ ، 50 سالہ ریشمہ ، 20 سالہ دعا ، 12 سالہ عبدالرحیم ، 11 سالہ عبدالرزاق ، 2 سالہ مدثر ، 18 سالہ سونیا ، 25 سالہ کلثوم اور 55 سالہ نصرت سمیت دیگر افراد کو طبی امداد فراہم کی جا رہی ہے۔
حادثے کے بعد خوشیوں سے بھرا سفر ماتم میں تبدیل ہوگیا، بارات کے قافلے میں دیگر گاڑیاں بھی شامل تھیں جس میں کچھ مہمان حیدرآباد سے بھی شادی میں شرکت کے لیے آئے ہوئے تھے۔
