لاہور : پنجاب میں سینیٹ کی 2نشستوں پرانتخاب کل ہوگا، جنرل نشست پر پی ٹی آئی کے ولید اقبال اور ن لیگ کے سعود مجید مدمقابل ہیں جبکہ خواتین کی نشست پر پی ٹی آئی کی سیمی ایزدی کا مقابلہ ن لیگ کی سائرہ افضل تارڑ سے ہیں۔
تفصیلات کے مطابق پنجاب سے سینیٹ کی دو خالی نشستوں پر پولنگ کل ہو گی، پنجاب اسمبلی کو پولنگ سٹیشن قراردےدیاگیا ہے، صوبائی الیکشن کمشنر ظفر حسین ریٹرننگ افسرہوں گے۔
جنرل نشست پر پاکستان تحریک انصاف کے ولید اقبال اور ن لیگ کے سعود مجید کے درمیان سخت مقابلہ متوقع ہے جبکہ خواتین کی نشست پرپی ٹی آئی کی سیمی ایزدی اورن لیگ کی سائرہ افضل تارڑ مدمقابل ہیں۔
سینیٹ کی دو نشستوں پر ضمنی انتخاب کے لیے 13 امیدوار دوڑ میں شامل ہیں، ایک امیدوار جمشید اقبال کے کاغذات نامزدگی مسترد کیے گئے ہیں، عمومی نشست کے لیے 3 خواتین کی مخصوص نشست پر 10امیدوار مد مقابل ہیں۔
دس امیدواروں میں سے عمومی نشست پر ولید اقبال ، سعود مجید، شیخ عابد وحید کے درمیان مقابلہ ہیں جبکہ خواتین کی نشست پرسیمی ایزدی، تنزیلہ ،عشرت اشرف، زرقا تیمور مدمقابل ہیں ، امیدواروں میں عاصمہ شجاع اور روبینہ شاہین بھی شامل ہیں۔
خیال رہے سپریم کورٹ نے سعدیہ عباسی کی رکنیت کالعدم قرار دیتے ہوئے موقف اختیار کیا تھا کہ سعدیہ عباسی کاغذات جمع کراتے وقت دہری شہریت کے حامل تھی اورسعدیہ عباسی اورہارون اختر کی نااہلی کے باعث نشستیں خالی ہوئی تھیں۔
دوسری جانب اپوزیشن لیڈرحمزہ شہبازنے پارلیمانی پارٹی کا اجلاس آج شام طلب کر لیا ہے ،جس میں ن لیگ کےامیدواروں کو جتوانے کی حکمت عملی طے کی جائے گی، اجلاس میں ارکان کو ووٹ ڈالنے کا طریقہ اور پریکٹس کرائی جائے گی۔
