کراچی: پاکستان سول ایوی ایشن اور برطانوی محکمہ برائے ٹرانسپورٹ نے باہمی تعاون کا ایک اور سنگ میل عبور کر لیا۔
برطانیہ کی جانب سے پی سی اے اے کو ایوی ایشن سیکیورٹی اسکرینرز کے لیے کمپیوٹر بیسڈ چیکنگ سوفٹ ویئر اور ٹریننگ پروگرام کا تحفہ دیا گیا ہے، اس حوالے سے اسلام آباد انٹرنیشنل ایئرپورٹ پر ایک مختصر تقریب کا انعقاد ہوا۔
فرسٹ سیکریٹری ایوی ایشن یو کے ہائی کمیشن اسلام آباد محمد عبدالغفار نے کمپیوٹرز ڈائریکٹر ایوی ایشن سیکیورٹی ریٹائرڈ ایئر کموڈور شاہد قادر کے حوالے کیے، اس موقع پر ایئرپورٹ منیجر آفتاب گیلانی سمیت ایوی ایشن انڈسٹری سے تعلق رکھنے والے معززین موجود تھے۔
فرسٹ سیکریٹری ایویشن یو کے ہائی کمیشن نے کہا کمپیوٹر پر مبنی تھریٹ امیج ریکگنیشن ٹریننگ پروگرام اور اس کے ہارڈ ویئر کی دستیابی ’آئی کیو‘ شرائط کے عین مطابق ہے، (یو کے ڈی ایف ٹی) ایویشن سیکیورٹی کے حوالے سے پاکستان سول ایویشن کی کوششوں میں تعاون کرتا رہے گا، حال ہی میں مکمل ہونے والے ’آئیکیو‘ فل اسکیل آڈٹ میں شان دار کارکردگی پر پی سی اے اے کو مبارک باد پیش کرتے ہیں۔
کمپیوٹر پر مبنی سسٹم کے ذریعے ایئر لائنز، ASF، کارگو وغیرہ سمیت ایوی ایشن انڈسٹری کے اسکرینرز کی چیکنگ اور جانچ پڑتال کی جا سکے گی، سسٹم متعارف ہونے کے بعد پاکستان صف اول کی ایویشن سیکیورٹی فراہم کرنے والے ممالک میں شامل ہو جائے گا۔
مستقبل قریب میں (یو کے ڈی ایف ٹی) کا ادارہ پاکستان میں ایویشن سیکیورٹی انسپکٹرز کی ٹریننگ اور تربیت کا اہتمام کرے گا، کمپیوٹر پر مبنی سیکیورٹی اسکرینرز کی چیکنگ اور تربیتی پروگرام کی فراہمی برطانیہ اور پاکستان کے درمیان پائیدار شراکت کو اجاگر کرتا ہے۔
