کراچی: سی اے اے نے کابل سے فضائی ٹریفک کے لیے فریکوئنسی جاری کر دی۔
تفصیلات کے مطابق افغانستان کے دارالحکومت کابل میں ایئر ٹریفک کی عدم دستیابی کے مسئلے کے حل کے لیے پاکستان سول ایوی ایشن اتھارٹی نے ایئر لائنز کو نیا ہدایت نامہ جاری کر دیا ہے۔
سول ایوی ایشن اتھارٹی نے ایک نوٹم جاری کرتے ہوئے کابل سے پاکستانی حدود میں آنے والی تمام پروازوں کی رہنمائی کے لیے فریکوئنسی جاری کر دی۔
سی اے اے کے مطابق کابل سے پاکستانی حدود میں داخلے سے 15 منٹ قبل تمام ایئرلائنز کے طیاروں کے کپتان لاہور، کراچی، اسلام آباد ایئر ٹریفک کنٹرول سے رابطہ کریں گے۔
سی اے اے کا کہنا ہے کہ فریکوئنسی کے ذریعے کپتانوں کو پاکستانی حدود میں رہنمائی فراہم کی جائے گی۔
واضح رہے کہ فریکوئنسی اسلام آباد، لاہور اور کراچی ایئر ٹریفک کنٹرول سے رابطے کے لیے جاری کی گئی ہے، ترجمان کا کہنا ہے کہ سی اے اے کا جاری کردہ نوٹم 21 اگست 2023 تک قابل عمل ہے۔
