کراچی: برٹش ایئرویز کی پہلی پرواز3جون کی صبح ساڑھے نو بجے اسلام آباد ایئرپورٹ پر لینڈ کرے گی ، طیارے کوواٹر سلوٹ پیش کیا جائے گا، برٹش ایئرویز کی بحالی سے سیاحت تجارتی اور سرمایہ کاری کو فروغ حاصل ہوگا۔
تفصیلات کے مطابق سول ایوی ایشن اتھارٹی نے برٹش ایئرویز کو باقاعدہ فلائٹ شیڈول جاری کردیا، شیڈول کے تحت برٹش ایئرویز کی پہلی پرواز3جون کی صبح ساڑھے نو بجے اسلام آباد ایئرپورٹ پر لینڈ کرے گی۔
سی اے اے کی جانب سے اسلام آباد ایئرپورٹ کو برٹش ایئرویز کے بوئنگ 787طیارے کو واٹر سلوٹ پیش کیا جائے گا۔
برٹش ایئرویز11سال بعد پاکستان کیلئے اپنی پروازیں شروع کررہی ہے اور اسلام آباد اور لندن کے ہتھرو ایئرپورٹ کے درمیان ہفتے میں 3 پروازیں چلائے گی۔
ماہرین کے مطابق اسلام آباد اور ہیتھرو کے درمیان برٹش ائیرویز کی پروازوں کی بحالی اچھی خبر ہے، تجارتی اور سرمایہ کاری روابط کو فروغ ملے گا۔
چند روز قبل وزیر ایوی ایشن غلام سرور کا کہنا تھا برٹش ائیر ویز 11 سال بعد پاکستان آرہی ہے، برٹش ائیر ویز ،جون 2019 سے اسلام آباد سے ہفتہ وار 3فلایٹس چلانے کی خواہش مند ہے۔
مزید پڑھیں : گیارہ سال بعد برٹش ائیرویز کا آئندہ ماہ سے پاکستان کے لئے پروازیں شروع کرنےکااعلان
خیال رہے رواں سال جنوری مین برٹش ہائی کمشنرنے سیکرٹری ایوی ایشن کو خط لکھاتھا ، جس میں کہا گیا تھا کہ پاکستان ایک محفوظ اور پُرامن ملک ہے، پاکستان نے دہشت گردی کے خاتمے کے لئے بھرپور اقدامات کیے، پاکستان میں برٹش ائرویز کا آپریشن دس سال سے بند تھا۔
برٹش ہائی کمشنر نے خط میں مزید بتایاتھا کہ رواں سال جون سے برٹش ایئرویز اسلام آباد سے اپنا فضائی آپریشن شروع کرے گی۔
یاد رہے برطانیہ کی فضائی کمپنی برٹش ائیر ویز نے ایک عشرے سے زیادہ وقفے کے بعد گذشتہ برس پاکستان سے اپنی پروازیں بحال کرنے کا اعلان کیا تھا اور پاک فوج نے بھی اس اعلان کا خیر مقدم کیا تھا ۔
ڈی جی آئی ایس پی آر میجر جنرل آصف غفور نے ایک بیان میں کہا تھا کہ یہ پیش رفت پاکستانی قوم اور سکیورٹی فورسز کی ملک میں امن واستحکام کے لیے ایک عشرے کی جدوجہد کا ثمر ہے۔
خیال رہے برٹش ائیر ویز نے بیس ستمبر دوہزار آٹھ کو اسلام آباد کے میریٹ ہوٹل پر تباہ کن خودکش بم حملے کے فوری بعد پاکستان کے لیے اپنی پروازیں معطل کردی تھیں ۔ اس بم دھماکے میں چون افراد ہلاک اور دو سو ستر زخمی ہوگئے تھے۔
