اسلام آباد : چیئرمین پی ٹی آئی عمران خان کا نام ای سی ایل میں شامل کردیا گیا، نیب راولپنڈی نےعمران خان کانام ای سی ایل میں ڈالنے کی درخواست کی تھی۔
تفصیلات کے مطابق 190ملین پاؤنڈ کے کیس میں چیئرمین پی ٹی آئی عمران خان کا نام ای سی ایل میں شامل کردیا گیاہے۔
ذرائع نے بتایا کہ عمران خان کا نام نیب راولپنڈی کی درخواست پر ای سی ایل میں شامل کیا گیا ، سرکلر سمری کے ذریعے وفاقی کابینہ نے منظوری دی۔
ذرائع کا کہنا ہے کہ بشریٰ بی بی کا نام بھی ای سی ایل میں شامل کرنے کا فیصلہ کرلیا گیا ہے، نیب کی جانب سے وزارت داخلہ کو خط لکھا جائے گا۔
یاد رہے گذشتہ ہفتے چیئرمین تحریک انصاف عمران خان اور ان کی سابق کابینہ کے ارکان کو جاری کیے گئے سفارتی پاسپورٹ منسوخ کردیے گئے تھے اور تمام 10 افراد کو نو فلائی لسٹ میں بھی شامل کردیا گیا تھا۔
ذرائع کے مطابق شاہ محمود قریشی، اسد عمر، پرویز خٹک، شیخ رشید، علی امین گنڈا پور، علی محمد خان، فرخ حبیب، زرتاج گل اور اعظم سواتی کے ڈپلومیٹک پاسپورٹ منسوخ کیے گئے تھے۔
اس سے قبل وفاقی حکومت نے چیئرمین پاکستان تحریک انصاف عمران خان اور ان کی اہلیہ بشریٰ بی بی سمیت 80 سے زائد افراد کا نام نو فلائی لسٹ میں شامل کر دیا تھا، ان افراد کے بیرون ملک سفر کرنے پر پابندی ہوگی۔
