اسلام آباد: کیبل آپریٹرز نے وزیر خزانہ اسحاق ڈار سے مذاکرات ناکام ہونے پر آج سے کیبل نشریات غیر معینہ مدت کے لیے بند کرنے کا فیصلہ کرلیا ہے۔ ملک کے مختلف شہروں میں کیبل نشریات بند ہونی شروع ہوگئی ہیں۔
تفصیلات کے مطابق پیمرا 23 نومبر کو ڈی ٹی ایچ کی نیلامی پر قائم ہے۔ اس ضمن میں کیبل آپریٹرز اور وزیر خزانہ اسحاق ڈار کے درمیان ہونے والے مذاکرات ناکام ہوگئے جس کے بعد کیبل آپریٹرز نے کیبل نشریات بند کرنے کا فیصلہ کرلیا ہے۔
کیبل آپریٹرز کے جاری کردہ اعلامیہ میں کہا گیا ہے کہ کیبل نشریات آج سے غیر معینہ مدت کے لیے بند کردی جائیں گی۔ ڈی ٹی ایچ کی نیلامی مؤخر ہونے تک کیبل نشریات بحال نہیں ہوں گی۔
کیبل آپریٹر ایسوسی ایشن کی جانب سے ہدایت جاری کی گئی ہے کہ تمام کیبل آپریٹرز نشریات کی بندش یقینی بنائیں۔
دوسری جانب چیئرمین پیمرا ابصار عالم کہتے ہیں کہ ڈی ٹی ایچ ایک سال تک آپریشنل نہ ہونے کی یقین دہانی کروائی تھی لیکن کیبل آپریٹرز نہیں چاہتے کہ ڈی ٹی ایچ کی نیلامی ہو۔
