اسلام آباد : کیمبرج بورڈ نے پرچے لیک ہونے کا اعتراف کرلیا اور کہا پرچہ لیک ہونے کی بہت سی خبریں جھوٹی نکلیں، یہ واضح ہے کہ امتحانات کو خراب کرنے کی کوشش کی گئی۔
کیمبرج امتحانات میں پرچے آؤٹ ہونے کے معاملے پر تفصیلی رپورٹ جاری کردی گئی ، جس میں کیمبرج بورڈ نے کئی پرچے آؤٹ ہونے کا الزام بے بنیاد قراردے دیا۔
کیمبرج بورڈ نے جزوی پرچے لیک ہونے کا اعتراف کرتے ہوئے کہا کہ امتحانات کی سیکیورٹی ٹیم نے اچھی طرح چھان بین کی، پرچہ لیک ہونے کی بہت سی خبریں جھوٹی نکلیں۔
رپورٹ میں کہا گیا کہ یہ واضح ہے کہ امتحانات کو خراب کرنے کی کوشش کی گئی اور جعلی کاغذات کے عوض امیدواروں سے پیسے بٹورنے کی کوشش کی گئی۔
مزید پڑھیں : اے لیول کے پپیرز کیسے لیک ہوئے؟ انکوئری کے لیے ذیلی کمیٹی تشکیل
بورڈ کا کہنا تھا کہ ہماری تحقیقات میں بدعنوانی کے کچھ ثبوت بھی ملیں ہیں، تین پرچوں کے کچھ حصے امتحان سے کچھ دیر قبل لیک ہوئے اور امتحان سے کچھ دیر پہلے تین امتحانی پرچوں کے حصے شیئر کیے گئے تھے۔
رپورٹ کے مطابق تحقیقات جاری ہیں اورثبوت ملتےہی کارروائی عمل میں لائی جائے گی۔
