ترکیہ : چڑیا گھر میں اونٹ نے بچے کو سر سے دبوچ لیا تاہم والد نے لپک کر اونٹ کے شکنجے سے بیٹے کو بچایا، دل دہلا دینے والے واقعے کی ویڈیو وائرل ہوگئی۔
تفصیلات کے مطابق ترکی کے شہر ڈینیزلی کے چڑیا گھر میں ایک دل دہلا دینے والا واقعہ پیش آیا، جہاں ایک بچہ اونٹ کے حملے سے بال بال بچ گیا، چونکا دینے والا واقعہ کیمرے میں قید ہوگیا۔
ڈینیزلی کے چڑیا گھر میں لی گئی دل دہلا دینے والی فوٹیج میں ایک چھوٹے بچے کو اونٹوں کے قریب آتے دکھایا گیا ہے، جیسے ہی بچہ قریب آتا ہے، اونٹ آگے بڑھ کر بچے کو گردن سے پکڑنے کی کوشش کرتا ہے تاہم خوش قسمتی سے باپ فورا لپک کر بچے کو بچا لیتا ہے۔
اونٹ کے حملے میں بچے کے سر اور گردن پر زخم آئے تاہم زخمی بچے کو اسپتال لے جایا گیا ، جہاں بچے کی حالت بہتر بتائی جاتی ہے۔
واقعے کے بعد ویڈیو سوشل میڈیا پر وائرل ہوئی تو چڑیا گھر کی حفاظت اور چھوٹے بچوں کے ساتھ ایسی سہولیات کا دورہ کرتے وقت چوکس نگرانی کی ضرورت کے بارے میں بحث شروع ہوگئی۔
خیال رہے چڑیا گھر میں زائرین اور جانوروں دونوں کی حفاظت کو یقینی بنانے کے لیے عموماً رکاوٹیں، باڑیں اور نشانیاں ہوتی ہیں تاکہ دونوں کے درمیان محفوظ فاصلہ رکھا جا سکے۔ زائرین کو ان ہدایات پر عمل کرنا چاہیے اور خطرناک حالات سے بچنے کے لیے جانوروں سے احترام کے ساتھ فاصلہ برقرار رکھنا چاہیے۔
