کینیڈین سیکیورٹی انٹیلی جنس سروس نے خبردار کیا ہے کہ بھارت کینیڈا کے عام انتخابات میں مداخلت کی کوشش کرسکتا ہے۔
غیر ملکی ذرائع ابلاغ کے مطابق سیکیورٹی انٹیلی جنس سروس کی ڈپٹی ڈائریکٹر وینیسالائیڈ نے پریس کانفرنس میں کہا کہ بھارت کینیڈین کمیونیٹیز اور جمہوری عمل میں مداخلت کا ارادہ اور صلاحیت رکھتا ہے۔
ریاست مخالف عناصرانتخابات میں مداخلت کیلئے مصنوعی ذہانت سے فائدہ اٹھا رہے ہیں۔
کینیڈین سیکیورٹی انٹیلی جنس سروس کی ڈپٹی ڈائریکٹر نے خدشہ ظاہرکیا کہ امکان ہے چین بھی انتخابات میں مداخلت کیلئے اے آئی ٹولز کا استعمال کریگا۔انہوں نے یہ الزام بھی لگایا کہ روس بھی ممکنہ طور پر کینیڈا کے خلاف سرگرمیاں کرسکتا ہے۔
واضح رہے کہ کینیڈا کے وزیراعظم مارک کارنی نے پارلیمنٹ تحلیل کرکے نئے الیکشن کرانے کا اعلان کیا ہے، انہوں نے کہا کہ 28 اپریل کو نئے انتخابات ہونگے۔
کینیڈا کے وزیراعظم مارک کارنی نے پارلیمنٹ کو تحلیل کرنے کیلئے گورنر جنرل سے باضابطہ ملاقات بھی کی ہے، وزیراعظم مارک کارنی نے کہا ہے کہ 28 اپریل کو کینیڈا میں نئے انتخابات کرائے جائیں گے۔
مارک کارنی کا کہنا ہے کہ ہمیں اپنی زندگی کے سب سے بڑے بحران کا سامنا ہے، ٹرمپ سے نمٹنے کیلئے کینیڈا کے لوگوں سے مضبوط مینڈیٹ مانگ رہا ہوں۔
ایران نے ایٹمی پروگرام پر امریکا سے براہ راست مذاکرات کا امکان مسترد کر دیا
انھوں نے کہا کہ نئی کینیڈین معیشت کی تعمیر کیلئے ہمیں تبدیلی کی ضرورت ہے، ٹرمپ کے غیرمنصفانہ تجارتی اقدامات اور ہماری خودمختاری کو خطرات لاحق ہیں۔
کینیڈین وزیراعظم مارک کارنی کا مزید کہنا تھا کہ ہمارا جواب ایک مضبوط معیشت اور زیادہ محفوظ کینیڈا کی تعمیرکیلئے ہونا چاہیے۔
