اسلام آباد : وفاقی وزیر اطلاعات فواد چوہدری نے کہا ہے کہ پاکستان اور کینیڈا میں مضبوط دو طرفہ تعلقات قائم ہیں، حکومت عمران خان کی قیادت میں آزادی اظہار رائے پر یقین رکھتی ہے۔
ان خیالات کا اظہار انہوں نے اسلام آباد میں ملاقات کیلئے آئے ہوئے کینیڈین ہائی کمشنر وینڈی کرسچن سے ملاقات کے موقع پر کیا، ملاقات میں دونوں ممالک کے تجارتی تعلقات اور باہمی دلچسپی کے امور پر تبادلہ خیال کیا گیا۔
فواد چوہدری نے کہا کہ پاکستان اور کینیڈا میں مضبوط دو طرفہ تعلقات قائم ہیں، حکومت دونوں ممالک کے تعلقات کو وسعت دینے کی خواہاں ہے۔
وفاقی وزیر اطلاعات کا مزید کہنا تھا کہ دونوں ممالک میں جمہوریت کے فروغ اور گڈ گورننس یقینی بنانے کے خیالات میں یکسانیت ہے، موجودہ حکومت عمران خان کی قیادت میں آزادی اظہار رائے پر مکمل یقین رکھتی ہے، اسٹیک ہولڈرز کو نفرت پر مبنی مواد کے تدارک کیلئے مشترکہ کاوشیں کرنا ہوں گی۔
اس موقع پر کینیڈین ہائی کمشنر وینڈی کرسچن کا کہنا تھا کہ کراچی سرمایہ کاری اور معاشی سرگرمیوں کا اہم مرکز ہے، پاکستان میں تجارت، سرمایہ کاری کیلئے مزید ممکنات تلاش کر رہے ہیں۔
