اسلام آباد: وزیر اعظم عمران خان کو کینیڈا کے ہم منصب جسٹن ٹروڈو نے ٹیلی فون کیا اور وزیر اعظم کا عہدہ سنبھالنے پر مبارک باد پیش کی۔
تفصیلات کے مطابق وزیراعظم عمران خان کو اندرون ملک اور بیرون ممالک سے وزیر اعظم منتخب ہونے پر مبارکباد کے پیغامات موصول ہورہے ہیں، کینیڈا کے ہم منصب جسٹن ٹروڈو نے بھی عمران خان کو فون کیا اور عہدہ سنبھالنے پر مبارک باد دی۔
وزیر اعظم عمران خان نے جسٹس ٹروڈو سے گفتگو کرتے ہوئے کہا کہ کینیڈا میں 4 لاکھ پاکستانی خدمات انجام دے رہے ہیں۔
مزید پڑھیں: وزیرِ اعظم عمران خان کو سری لنکا کے وزیرِ اعظم کا ٹیلی فون
واضح رہے کہ گزشتہ روز سری لنکا کے وزیر اعظم رنیل وکرما سنگھا نے وزیر اعظم عمران خان کو فون کرکے وزارت عظمیٰ کا عہدہ سنبھالنے پر مبارکباد دی تھی۔
سری لنکن وزیرِ اعظم وکرما سنگھا نے فون کر کے کہا تھا کہ دو طرفہ تعلقات میں اضافے کے لیے مل کر کام کرنا وقت کی اہم ضرورت ہے۔
وزیرِ اعظم عمران خان کا کہنا تھا کہ پاکستان اور سری لنکا کے درمیان گہرے اور دوستانہ تعلقات استوار ہیں، ان تعلقات میں اضافے کے لیے کام کیا جائے گا۔
دونوں ممالک کے رہنماؤں نے اس بات پر اتفاق کیا کہ سیاست، معیشت، دفاع، سیاحت سمیت مختلف شعبوں میں دو طرفہ تعلقات میں اضافے کی ضرورت ہے۔
